Երևանում նախատեսված հայ-ադրբեջանական փորձագիտական հանդիպումը հետաձգվել է
«Խաղաղության կամուրջ» նախաձեռնության շրջանակում այս օրերին Երևանում նախատեսված հայ և ադրբեջանցի փորձագետների հանդիպումը հետաձգվել է ադրբեջանական կողմի խնդրանքով։ Այս մասին հայտնում է ադրբեջանական APA գործակալությունը։
Ըստ աղբյուրի՝ ադրբեջանական կողմը ներկա փուլում հանդիպման անցկացումը նպատակահարմար չի համարում։
«Խաղաղության կամուրջի» ադրբեջանական և հայաստանյան խմբերի անդամները սեպտեմբերի 14-ին հանդես էին եկել առանձին հայտարարություններով՝ անդրադառնալով սեպտեմբերի 11–12-ին ադրբեջանական վերահսկողության տակ գտնվող Արցախի տարածքներ դիվանագետների այցին և Գանձասարի վանական համալիրում հայկական մշակութային ժառանգության ներկայացմանը։
Հայաստանյան խումբը նշել է, որ վերջին զարգացումները «խորացնում են անվստահությունը» և կարող են լրացուցիչ տարածք ստեղծել նրանց համար, ովքեր պնդում են, թե երկխոսությունն անիմաստ է։
Ադրբեջանական խմբի անդամները այցի վերաբերյալ հայկական արձագանքը բնորոշում են որպես «թշնամական և անընդունելի»։
Ադրբեջանական հայտարարությունը հիմնականում պաշտպանում է դիվանագետների այցը, Ադրբեջանի տարածքային ամբողջականության և մշակութային ժառանգության վերաբերյալ պաշտոնական դիրքորոշումները և քննադատում հայկական արձագանքը։
Ադրբեջանում հավատարմագրված դիվանագիտական կորպուսի բազմաթիվ ներկայացուցիչներ՝ երկօրյա այցով օրերս գնացել էին Արցախ։ Այցին մասնակցում էին 58 երկրների և 9 միջազգային կազմակերպությունների դիվանագիտական կորպուսի 150 ներկայացուցիչներ։
Այցի ընթացքում Ադրբեջանի նախագահի օգնական Հիքմեթ Հաջիևը դիվանագետներին ներկայացնելով հայկական պատմամշակութային կոթողները (այդ թվում՝ Գանձասարն ու Դադիվանքը) դրանք որպես «հին Կովկասյան Աղվանքի» քրիստոնեական ժառանգություն է կոչել:
Պատմություններ
