Տեսչական մարմինը հորդորում է «Զվարթնոցում» օգտվել բացառապես լիցենզավորված տաքսիներից

Քաղաքաշինության, տեխնիկական և հրդեհային անվտանգության տեսչական մարմինը հորդորում է «Զվարթնոց» օդանավակայանում օգտվել բացառապես օդանավակայանի տարածքում՝ տաքսու պաշտոնական կայանատեղից գործող լիցենզավորված տաքսիներին։

Տեսչական մարմից հիշեցնում են, որ օդանավակայանում տաքսի ծառայություն մատուցելու համար անհրաժեշտ է ունենալ համապատասխան լիցենզիա։

Լիցենզավորված տրանսպորտային միջոցների համար պարտադիր պայմաններն են՝

• մինչև յոթ տարվա արտադրության,

• սպիտակ հիմնագույնի,

• գործարանային վառելիքային համակարգով շահագործվող

• «Աէրոտաքսի» գրառմամբ և տաքսու շախմատաձև տարբերանշանով արտաքին կահավորում

• սակաչափիչ ունեցող ավտոմոբիլների շահագործումը։

Տեսչական մարմինը հորդորում է խուսափել օդանավակայանի տարածքում կամ հարակից հատվածներում պատահական անձանց կողմից առաջարկվող տաքսի ծառայություններից, քանի որ վերջիններիս գործունեությունը կարող է չհամապատասխանել օրենսդրությամբ սահմանված պահանջներին։

«Ուղևորների անվտանգության, հարմարավետության և սպասարկման պատշաճ որակի ապահովման նպատակով անհրաժեշտ է օգտվել միայն պաշտոնական կայանատեղից ուղևորափոխադրումներ իրականացնող և համապատասխան լիցենզիա ունեցող տաքսի ծառայություններից»,- ասված է տեսչական մարմնի տարածած հաղորդագրության մեջ։

Տեսչական մարմինը՝ Ոստիկանության հետ համատեղ, շարունակաբար իրականացնում է խստացված վերահսկողական գործառույթներ օդանավակայանի տարածքում՝ լիցենզավորման պահանջների պահպանման նկատմամբ։