Թրամփը մերժել է Թեհրանի առաջարկը․ Իրանի զինուժը սպառնում է հարվածել ամերիկյան թիրախներին

ԱՄՆ նախագահ Դոնալդ Թրամփը մերժել է Իրանի առաջարկած յոթօրյա ճանապարհային քարտեզը, որը նպատակ ուներ ավարտել պատերազմը, վերաբացել Հորմուզի նեղուցը և վերսկսել միջուկային բանակցությունները։ ԱՄՆ ղեկավարը հայտարարել է, թե Թեհրանը համաձայնագիր է փնտրում ֆինանսական ծանր վիճակի պատճառով՝ նշելով, որ «նրանք կործանվում են, փողը չի մտնում երկիր»։

Իրանական կիսապաշտոնական «Mehr» գործակալության փոխանցմամբ, Իրանի զինված ուժերը նախազգուշացրել են, որ Մերձավոր Արևելքում ամերիկյան բոլոր տեղակայման կենտրոնները կդառնան թիրախ, եթե Վաշինգտոնը «սխալ թույլ տա» և հարձակվի Իրանի վրա։

Ստեղծված իրավիճակի վերաբերյալ ԱՄՆ պետդեպարտամենտի մամուլի քարտուղար Թոմի Փիգոտը «Al Jazeera»-ին ասել է, որ Իրանի հետ դիվանագիտության դուռը բաց է եղել հենց սկզբից, և ընդգծելով, որ «Միացյալ Նահանգները չեն, որ խոչընդոտել են դրան»։

Իր հերթին, Իրանի նախագահ Մասուդ Փեզեշքիանը «Al Jazeera»-ին հայտնել է, որ նրանք, ովքեր «կարծում էին, թե պատժամիջոցներով կարող են հարվածել իրանցի ժողովրդին, սխալվել են»։ Նա նաև հավելել է, որ Կատարն ու Պակիստանը ներկայում միջնորդի դեր են կատարում և Թեհրանի ուղերձները փոխանցում են Վաշինգտոնին։