ԱԹՍ վարչությունը կվերածվի ԱԹՍ զորքերի․ Պապիկյան
Հայաստանի զինված ուժերում գործող ԱԹՍ վարչությունը առաջիկայում կվերածվի ԱԹՍ զորքերի։ Այս մասին «Զինուժի» «Միլքաստ» փոդքաստում ասել է պաշտպանության նախարար Սուրեն Պապիկյանը։
Նրա խոսքով՝ որոշումը պայմանավորված է ժամանակակից պատերազմների փորձով, որտեղ ԱԹՍ-ները շարունակում են որոշիչ դեր ունենալ։
«Աշխարհը գնում է մի նոր ճանապարհով, այս պահին աշխարհում տեղի ունեցող ռազմական գործողությունները նրա մասին են, որ ԱԹՍ-ն շարունակում է որոշիչ գործոն լինել»,- ասել է Պապիկյանը։
Պապիկյանը նաև հայտնել է, որ նոր զինվորական համազգեստի զորային փորձարկումները դեռ շարունակվում են։
Նախարարը հայտնել է, որ այս տարի նախատեսվում է նոր համազգեստի մրցույթ, իսկ հաջորդ տարի արդեն կարող են սկսվել մատակարարումները։
Պապիկյանի խոսքով՝ օրենսդրական փոփոխությամբ նախատեսվում է արգելել նոր համազգեստի վաճառքը։ Զորացրվելուց հետո ժամկետային զինծառայողը նույնպես չի կարողանալու այն տուն տանել։
«Նպատակ ունենք նաև յուրաքանչյուր համազգեստ իր շտրիխ կոդով նույնականացնել անձի հետ»,- ասել է Պապիկյանը՝ հավելելով, որ այդ կերպ հնարավոր կլինի վերահսկել, թե որ զինծառայողին է հատկացված տվյալ համազգեստը։
Պատմություններ
