Արաբական Միացյալ Էմիրությունների գլխավոր դատախազ Համադ Սաիֆ ալ-Շամսին հայտարարել է, որ սեպտեմբերի 30-ին FlyDubai ավիաընկերության՝ Դուբայից Թել Ավիվ չվերթն իրականացնող օդանավում երկրորդ օդաչուն «փորձել է ահաբեկչական գործողություն իրականացնել»։
Քննության տվյալներով՝ երկրորդ օդաչուն՝ 29-ամյա քաղաքացին, թռիչքի ընթացքում վթարային կացնով հարձակվել է օդանավի հրամանատար, Հնդկաստանի քաղաքացի Սմիթ Մաչհարայի վրա և փորձել խլել ինքնաթիռի կառավարումը։
Քննության վերջնական արդյունքները կհրապարակվեն բոլոր ընթացակարգերի ավարտից հետո։
Միջադեպը տեղի է ունեցել սեպտեմբերի 30-ին FlyDubai-ի Boeing 737 օդանավում, որում եղել է 174 ուղևոր, այդ թվում՝ 27 երեխա։ Հարձակման հետևանքով վնասվածքներ են ստացել օդանավի հրամանատարն ու երկրորդ օդաչուն։
Ականատեսների վկայությամբ՝ ուղևորները, լսելով վիրավորված օդաչուի օգնության կանչերը, օգնության են հասել, գետնին գցել հարձակվողին և կապել նրան։ Դրանից հետո օդանավի կառավարումը ստանձնել են պահեստային երկու օդաչուները, որոնք մինչ այդ գտնվել են ինքնաթիռի հետնամասում։
Պատմություններ
