Դուբայի և Հնդկաստանի միջև ոչ նավթային առևտրի ծավալը 2025-ին հասել է ռեկորդային $60.6 մլրդ-ի՝ մեկ տարում աճելով 15%-ով։ Միաժամանակ Դուբայի Առևտրի պալատի ակտիվ անդամ հնդկական ընկերությունների թիվը 2026-ի հունիսի վերջին հասել է 85,841-ի։ Այս մասին ասվում է Arabian Business կայքում օգոստոսի հրապարակված հոդվածում։
2016-2025-ին Դուբայը ներգրավել է շուրջ $8.8 մլրդ-ի հնդկական ներդրումներ։
Դուբայի պալատների նախագահ և գլխավոր տնօրեն Մոհամադ Ալի Ռաշեդ Լութահը Նյու Դելիում անցկացված The Economic Times World Leaders Forum 2026-ի քննարկմանը ներկայացրել է երկու կողմերի տնտեսական համագործակցության հիմնական ցուցանիշները։ Միջոցառմանը ներկա է եղել նաև Հնդկաստանի վարչապետ Նարենդրա Մոդին։
Դուբայի և Հնդկաստանի ոչ նավթային առևտուրը վերջին տասնամյակում աճել է 136.2%-ով։ 2016-ին դրա ծավալը կազմել էր $25.6 մլրդ։ Այս աճի արդյունքում Հնդկաստանը դարձել է Դուբայի երկրորդ խոշոր առևտրային գործընկերը։
Լութահի խոսքով՝ Դուբայի և Հնդկաստանի հարաբերությունները շարունակում են ընդլայնվել և դիվերսիֆիկացվել՝ երկու շուկաներում բիզնեսի փոփոխվող պահանջներին համապատասխան։
Առևտուրը շարունակում է մնալ տնտեսական կապերի առանցքային բաղադրիչը, սակայն համագործակցությունն աստիճանաբար տարածվում է նաև ապագայի տեխնոլոգիաների վրա, այդ թվում՝ գործակալային արհեստական բանականության (Agentic AI) և թվային տնտեսության ոլորտներում։
Դուբայում հնդկական ընկերությունների թիվն աճում է
Միայն 2026-ի առաջին կիսամյակում Դուբայի Առևտրի պալատին միացել է 7,579 նոր հնդկական ընկերություն։ Արդյունքում հունիսի վերջին պալատի ակտիվ անդամ հնդկական ընկերությունների ընդհանուր թիվը հասել է 85,841-ի՝ մեկ տարվա ընթացքում աճելով 15%-ով։
«Այս թվերը ցույց են տալիս, որ հնդկական ընկերությունները Դուբայը գնալով ավելի շատ են դիտարկում որպես գլոբալ կենտրոն, որտեղից կարող են զարգացնել միջազգային գործունեությունն ու ընդլայնել ներդրումները։ Դրանք նաև արտացոլում են հնդկական գործարար համայնքի բարձր վստահությունը Դուբայի և նրա հետագա աճի հեռանկարների նկատմամբ»,- ասել է Լութահը։
Դուբայը հնդկական ընկերություններին հնարավորություն է տալիս մուտք գործել Մերձավոր Արևելքի, Աֆրիկայի և այլ տարածաշրջանների շուկաներ՝ օգտվելով զարգացած ենթակառուցվածքներից, միջազգային կապերից և մրցունակ բիզնես միջավայրից։
2016-2025-ին Դուբայը ներգրավել է մոտ $8.8 մլրդ-ի հնդկական ներդրումներ։ Միայն 2025-ին Հնդկաստանից ուղղակի օտարերկրյա ներդրումների ծավալը կազմել է $2.3 մլրդ։
Ներդրումային հոսքերը եղել են նաև հակառակ ուղղությամբ։ Դուբայից գործող ընկերությունները 2016-2025-ին Հնդկաստանում 147 նախագծում ներդրել են շուրջ $9.3 մլրդ, ինչի արդյունքում ստեղծվել է 55,274 աշխատատեղ։
Դուբայում գործող հնդկական ընկերությունները ներկայացնում են տարբեր ոլորտներ։ Դուբայի Առևտրի պալատում գրանցված ակտիվ հնդկական ընկերությունների 45%-ը զբաղվում է առևտրով և ծառայություններով։ Անշարժ գույքի, վարձակալության և բիզնես ծառայությունների բաժինը կազմում է 27.3%, շինարարությանը՝ 19%։
Լութահը կարևորել է նաև ԱՄԷ-ի և Հնդկաստանի Համապարփակ տնտեսական գործընկերության համաձայնագիրը (CEPA), որն ուժի մեջ է մտել 2022-ի մայիսին։
Համաձայնագիրը նպաստել է առևտրային խոչընդոտների նվազեցմանը, շուկաների հասանելիության բարելավմանը և բիզնեսի համար նոր հնարավորությունների ստեղծմանը։ Դուբայի և Հնդկաստանի ոչ նավթային առևտուրը 2022-2025-ին աճել է 35%-ով՝ $44.9 մլրդ-ից հասնելով $60.6 մլրդ-ի։
Արհեստական բանականությունը՝ նոր ուղղություն
Տեխնոլոգիաները ավելի մեծ դեր են ունենալու Դուբայի և Հնդկաստանի տնտեսական հարաբերությունների հաջորդ փուլում։
Լութահը գործակալային արհեստական բանականությունը, առաջատար տեխնոլոգիաները (deep tech), ֆինանսական տեխնոլոգիաները և թվային ծառայությունները նշել է որպես ապագա համագործակցությունը ձևավորող հիմնական ուղղություններ։
Դուբայը վերջերս հայտարարել է մասնավոր հատվածում գործակալային արհեստական բանականության կիրառումն արագացնելու նախաձեռնության մասին։ Դուբայի պալատները դրա շրջանակում սկսել են մշակել մասնագիտացված վերապատրաստման ծրագրեր և ինկուբատորներ այս ոլորտում գործող ընկերությունների համար։
Պալատները նաև աջակցում են գործակալային AI լուծումներ մշակող ընկերությունների զարգացմանը, գիտելիքների փոխանակմանը և բիզնես կառույցների կարողությունների բարձրացմանը։
Նպատակն է մեծացնել մասնավոր հատվածի մրցունակությունը և ամրապնդել Դուբայի դիրքը նոր տեխնոլոգիաների կիրառման ոլորտում։
Լութահի խոսքով՝ Դուբայի՝ գործակալային AI-ի ներդրումն արագացնելու քաղաքականությունը հնարավորություններ է ստեղծում նաև հնդկական տեխնոլոգիական ընկերությունների ու նորարարների համար՝ էմիրություն բերելու իրենց փորձը, մշակելու նոր լուծումներ և համագործակցելու տեղական բիզնեսների հետ։
Նրա գնահատմամբ՝ նոր տեխնոլոգիաները գնալով ավելի մեծ ազդեցություն կունենան Դուբայ-Հնդկաստան տնտեսական համագործակցության վրա՝ ձևավորելով նոր ոլորտներ, ներդրումային հնարավորություններ և բիզնես մոդելներ։
Պատմություններ
