Գերմանիայի հետախուզության նախկին ղեկավարը ձերբակալվել է Ադրբեջանի օգտին լրտեսության կասկածանքով

Գերմանիայի արտաքին հետախուզության նախկին ղեկավար Աուգուստ Հաննինգը հոկտեմբերի 6-ին ձերբակալվել է լրտեսության և պետական դավաճանության փորձի կասկածանքով։ Der Spiegel պարբերականը հայտնում է, որ նա կարող էր գաղտնի տեղեկությունների հիման վրա վերլուծություն պատրաստել Ադրբեջանի հետախուզության աշխատակցի համար։

Քննիչները կասկածում են, որ պետական ծառայությունից հեռանալուց հետո Հաննինգը գաղտնի փաստաթղթեր է ստացել իր նախկին ենթակայից և դրանք օգտագործել օտարերկրյա հետախուզության համար վերլուծություն կազմելու նպատակով։ Դեռ պարզված չէ՝ արդյոք նյութը հասել է հասցեատիրոջը։ Գերմանիայի դաշնային դատախազությունը չի հայտնել, թե որ երկրի մասին է խոսքը։

Հաննինգի հետ ձերբակալվել է նաև նրա նախկին աշխատակից Մանֆրեդ Դ.-ն։ Քննության տվյալներով՝ նա վարձատրության դիմաց Հաննինգին փոխանցել է Դաշնային հետախուզական ծառայության՝ BND-ի շուրջ 2,000 փաստաթուղթ, որոնցից շատերը գաղտնի էին։ Հաննինգը, ըստ քննիչների, այդ տեղեկություններն օգտագործել է մասնավոր խորհրդատվական գործունեության ընթացքում՝ առևտրային շահ ստանալու համար։

80-ամյա Հաննինգը BND-ն ղեկավարել է 1998-2005 թվականներին, ապա մինչև 2009 թվականն աշխատել է Գերմանիայի ներքին գործերի նախարարությունում՝ որպես պետական քարտուղար։ Պետական ծառայությունից հեռանալուց հետո նա զբաղվել է խորհրդատվությամբ և լոբբիստական գործունեությամբ։ Նա նաև Գերմանա-ադրբեջանական ֆորումի վարչության անդամ էր։