Ֆրանսիայում չորրորդ շաբաթն է՝ շարունակվում են աշակերտների բողոքի ցույցերը

Ֆրանսիայում արդեն չորրորդ շաբաթն է՝ շարունակվում են աշակերտների բողոքի ցույցերը։ Նրանք պահանջում են ավելացնել կրթության ֆինանսավորումը, լուծել ուսուցիչների պակասի խնդիրը և բարելավել դպրոցների պայմանները, հաղորդում է Reuters-ը։

Բողոքի շարժումը սկսվել է սեպտեմբերի 21-ին՝ Փարիզի սոցիալապես անապահով թաղամասերից մեկի ավագ դպրոցում, ապա տարածվել երկրի տարբեր քաղաքներում։ Աշակերտները դժգոհում են գերծանրաբեռնված դասարաններից, դպրոցական շենքերի անմխիթար վիճակից և կրթության անբավարար ֆինանսավորումից։

Ցույցերն ուղեկցվել են երթերով, հարյուրավոր դպրոցների մուտքերի արգելափակմամբ, որոշ դեպքերում՝ ոստիկանության հետ բախումներով։

Հոկտեմբերի 13-ին Փարիզում և Ֆրանսիայի այլ քաղաքներում աշակերտները կրկին դուրս են եկել փողոց։ Փարիզից հյուսիս գտնվող Սեն Դենի քաղաքի ավագ դպրոցներից մեկի մոտ ցուցարարներին է միացել նաև շվեդ բնապահպան ակտիվիստ Գրետա Թունբերգը։

«Մեզ ոգեշնչում են այն երիտասարդները, որոնք պահանջում են իրենց հիմնարար իրավունքների ապահովումը»,- լրագրողներին ասել է Թունբերգը։

Հոկտեմբերի 8-ին, Ֆրանսիայի ներքին գործերի նախարարության տվյալներով, ամբողջ երկրում բողոքի ցույցերին մասնակցել է շուրջ 71 500 մարդ, այդ թվում՝ 24 500-ը Փարիզում։ Ոստիկանությունը ձերբակալել է ավելի քան 500 մարդու։

Ի պատասխան բողոքի ցույցերի՝ Ֆրանսիայի կրթության նախարարը խոստացել է հրատապ կարգով ներգրավել ևս 3000 ուսուցչի։