Ֆրանսիայում հոկտեմբերի 24-ին նախատեսված զանգվածային բողոքի ցույցերի ընթացքում կտեղակայվի 70 հազար ոստիկան՝ նախորդ շաբաթ տեղի ունեցած բռնությունների և թալանի կրկնությունը կանխելու համար։ Այս մասին հոկտեմբերի 23-ին հայտարարել է երկրի ներքին գործերի նախարար Լորան Նունյեսը, հաղորդում է Reuters-ը։
Նախարարի խոսքով՝ նախորդ շաբաթվա համեմատ փողոցներում 10 հազարով ավելի ոստիկան կլինի։ Անվտանգության ապահովման համար կներգրավվեն հատուկ ստորաբաժանումներ, զրահամեքենաներ, ուղղաթիռներ, անօդաչուներ և ջրցան մեքենաներ։
«Մենք անզիջում ենք լինելու անկարգություններ իրականացնողների, թալանչիների և բոլոր նրանց նկատմամբ, ովքեր բռնության գործողություններ կկատարեն»,- հայտարարել է Նունյեսը։
Փարիզում թույլատրվել է անցկացնել միայն արհմիությունների կազմակերպած մեկ ցույց։ Ուսանողական UNEF միության և «Դեղին ժիլետների» շարժման ներկայացրած հայտերը մերժվել են։ Ցույցերն արգելվել են նաև Ֆրանսիայի մի շարք այլ քաղաքներում։
Նոր անկարգությունների մտավախությամբ Փարիզի Լուվրի և Օրսեի թանգարանները, նաև Օպերան հայտարարել են, որ շաբաթ օրը փակ են լինելու։
Ֆրանսիայում բողոքի ցույցերը սկսվել են սեպտեմբերի երկրորդ կեսին՝ ուսուցիչների պակասի, դպրոցների անբարեկարգ վիճակի և կրթության անբավարար ֆինանսավորման դեմ։ Հետագայում շարժումը տարածվել է ամբողջ երկրում՝ ընդգրկելով նաև կյանքի թանկացման և հանրային ծառայությունների խնդիրների դեմ բողոքները։
Նախորդ շաբաթ տեղի ունեցած զանգվածային ցույցերին, Ֆրանսիայի ներքին գործերի նախարարության տվյալներով, մասնակցել է շուրջ 550 հազար մարդ, որից 110 հազարը՝ Փարիզում։
Ցույցերն ուղեկցվել են ոստիկանության հետ բախումներով, հրկիզումներով և խանութների թալանով։
Պատմություններ
