Ֆրանսիայում հոկտեմբերի 17-ին կյանքի թանկացման և հանրային ծառայությունների վիճակի վատթարացման դեմ զանգվածային բողոքի ցույցերն ուղեկցվել են բռնություններով։ Երկրի տարբեր քաղաքներում ցուցարարների և ոստիկանության միջև բախումներ են տեղի ունեցել։ Ձերբակալվել է շուրջ 1200 մարդ, վիրավորվել՝ ավելի քան 150 ոստիկան, հաղորդում է BBC-ն։
Ֆրանսիայում բողոքի ցույցերը սկսվել են սեպտեմբերի կեսերին՝ Փարիզի արվարձաններից մեկում։ Սկզբում դպրոցականներն ու ուսուցիչները բողոքում էին կրթության անբավարար ֆինանսավորման, ուսուցիչների պակասի և դպրոցներում վատ պայմանների դեմ։ Հետագայում շարժումը տարածվել է ամբողջ երկրում, իսկ կրթական խնդիրներին ավելացել են կյանքի թանկացման և սոցիալական անհավասարության վերաբերյալ դժգոհությունները։
Ֆրանսիայի ներքին գործերի նախարար Լորան Նունյեսի փոխանցմամբ՝ ցույցերին մասնակցել է շուրջ 550 հազար մարդ, որից 110 հազարը՝ Փարիզում։
Մի շարք քաղաքներում բախումներ են տեղի ունեցել։ Ցուցարարների առանձին խմբեր կոտրել են խանութների ցուցափեղկերը, ներխուժել քաղաքապետարանների շենքեր և հրդեհներ բռնկել։ Փարիզում ոստիկանությունը կիրառել է արցունքաբեր գազ և ջրցան մեքենաներ։
Նախագահ Էմանուել Մակրոնը հայտարարել է, որ պետական շենքերի և առևտրային հաստատությունների վրա հարձակումներ իրականացրած անձինք կպատժվեն։ Արդարադատության նախարարն էլ հայտնել է, որ դատախազներին հանձնարարել է խիստ իրավական արձագանք տալ բռնություններին։
Պատմություններ
