Ընթացիկ տարվա հունվար-սեպտեմբեր ամիսներին Ադրբեջանից Հայաստան է արտահանվել 23 մլն 450 հազար դոլարի ապրանք: Այս մասին հայտնում են ադրբեջանական լրատվականները՝ վկայակոչելով Ադրբեջանի պետական մաքսային կոմիտեի տվյալները:
Ըստ աղբյուրի՝ այս ցուցանիշը կազմել է Ադրբեջանի ընդհանուր արտահանման ծավալի 0,10 տոկոսը: Նույն ժամանակահատվածում Հայաստանից Ադրբեջան ներմուծման ծավալը կազմել է 96,46 հազար դոլար:
Նախորդ ամիս Հայաստանի էկոնոմիկայի նախարար Գևորգ Պապոյանը հայտարարել էր Հայաստանից Ադրբեջան ալյումինե փայլաթիթեղի արտահանման մասին:
Հայաստանի և Ադրբեջանի միջև առևտրային կապերի զարգացումը վերջին տարում ակտիվացել է։
ՊԵԿ տվյալների համաձայն Ադրբեջանից Հայաստան ներմուծման ճնշող մեծամասնությունը՝ ավելի քան 99 տոկոսը, կազմել են նավթը և նավթամթերքը։ Բացի վառելիքից, ներմուծվել է նաև պլաստմասսայից շինարարական դետալներ։
Հայաստան ադրբեջանական արտադրանքի առաջին խմբաքանակներից մեկը հասել էր 2025-ի դեկտեմբերին․ Վրաստանի տարածքով Հայաստան էր ներկրվել ադրբեջանական SOCAR ընկերության բենզին։
Պատմություններ
