Երևանի ավտոբուսներից մեկում կնոջը վիրավորելու և նվաստացնելու դեպքի առթիվ քրեական վարույթ է նախաձեռնվել, տեսանյութում երևացող տղամարդը ձերբակալվել է։ Այս մասին հայտնել է Քննչական կոմիտեի մամուլի խոսնակ Կիմա Ավդալյանը։
Նրա փոխանցմամբ՝ քրեական վարույթը նախաձեռնվել է հոգեկան ուժեղ տառապանք պատճառելու և խուլիգանություն կատարելու հատկանիշներով։
Հոկտեմբերի 19-ին համացանցում տարածված տեսանյութում երևում է, թե ինչպես է տղամարդը ավտոբուսում վիրավորական արտահայտություններ անում կողքին նստած կնոջ հասցեին։ Ուղևորներից մեկը փորձել է միջամտել, ինչից հետո վիճաբանություն է սկսվել։
Ավելի վաղ Ներքին գործերի նախարարությունը հայտնել էր, որ տղամարդը ձերբակալվել և ներկայացվել է նախաքննական մարմին։ Ոստիկանությունը միջադեպի վերաբերյալ նյութերը փոխանցել էր Քննչական կոմիտե։
Հայաստանում քննարկվում է ընտանեկան և կենցաղային բռնության դեմ պայքարի օրենսդրության խստացումը։ «Քաղաքացիական պայմանագիր»-ն Ազգային ժողով է ներկայացրել օրենսդրական փոփոխությունների փաթեթ, որով առաջարկվում է ընտանեկան բռնությունն առանձնացնել որպես ինքնուրույն հանցագործություն և խստացնել դրա համար նախատեսված պատասխանատվությունը։
Վարչապետ Նիկոլ Փաշինյանի կինը՝ Աննա Հակոբյանը, նույնպես նախաձեռնություն է սկսել ընտանեկան բռնության դեմ պայքարի ուղղությամբ։ Նա հոկտեմբերի 3-ին ստորագրահավաք է սկսել՝ ի աջակցություն օրենսդրական փոփոխությունների ընդունմանը։ Հակոբյանի առաջարկները ներառվել են Ազգային ժողով ներկայացված օրենսդրական փաթեթում։
Պատմություններ
