«Այս հրաշքները շուտով կճախրեն Հայաստանի երկնքում»․ պաշտպանության նախարար Սուրեն Պապիկյանը Չեխիայից այս վերտառությամբ տեսանյութ է հրապարակել, որում, ըստ ամենայնի, L-39NG (Skyfox) ինքնաթիռ է։
L-39NG Skyfox-ը չեխական արտադրության ժամանակակից, երկտեղանոց ռեակտիվ ռազմական ինքնաթիռ է, որը նախատեսված է առաջին հերթին ռազմական օդաչուների պատրաստման, ինչպես նաև թեթև մարտական գործողությունների համար։ Այն արտադրում է չեխական Aero Vodochody ընկերությունը և խորհրդային ժամանակաշրջանի հայտնի L-39 Albatros ուսումնամարտական ինքնաթիռի նոր սերունդն է։
Սուրեն Պապիկյանն այլ մանրամասներ չի հայտնել իր հրապարակած նկարի հետ։ Նա հոկտեմբերի 20-ին պաշտոնական այցով մեկնել է Չեխիա։
Հայաստանն ու Չեխիան ռազմատեխնիկական համագործակցության համաձայնագիր են ստորագրել 2019-ին, որն ուժի մեջ է մտել 2023-ի հոկտեմբերին։
2024-ի ապրիլին Հայաստան էր այցելել Չեխիայի պաշտպանության նախարարության պատվիրակությունը, որի կազմում էին նաև չեխական ռազմարդյունաբերական ընկերությունների ներկայացուցիչներ։
Հայաստանի պաշտպանության նախարարությունը հայտնել էր, որ կողմերը ռազմատեխնիկական համագործակցության շուրջ մի շարք պայմանավորվածություններ են ձեռք բերել։ Մանրամասներ չէին հրապարակվել։
Պատմություններ
