Հորմուզի նեղուցում երկու գերլցանավ է պայթել ծովային ականների վրա․ ԻՀՊԿ

Հորմուզի նեղուցում երկու գերլցանավ է պայթել ծովային ականների վրա, հաղորդում է Իրանի Իսլամական հեղափոխության պահապանների կորպուսը (ԻՀՊԿ)։

ԻՀՊԿ-ի ռազմածովային ուժերի հոկտեմբերի 23-ի հայտարարության համաձայն՝ միջադեպը տեղի է ունեցել Հորմուզի նեղուցի հարավային հատվածում, ինչի հետևանքով պայթյուններ են տեղի ունեցել և ուժեղ հրդեհներ բռնկվել։

ԻՀՊԿ-ի հաղորդմամբ՝ նավերը փորձել են անցնել Իրանի կողմից չարտոնված երթուղով։ Պայթյունների հետևանքով դրանց շարժիչային համակարգերը շարքից դուրս են եկել, իսկ անձնակազմերը լքել են նավերը։ Իրանական կողմի տեղեկություններով՝ երկու լցանավերը միասին տեղափոխել են ավելի քան 4,5 միլիոն բարել հում նավթ։ Դեպքի մասին տեղեկությունը դեռևս չի հաստատվել այլ աղբյուրներով։

Վաշինգտոնի Մերձավոր Արևելքի քաղաքականության ինստիտուտի տվյալներով՝ հոկտեմբերին նեղուցում և հարակից ջրերում արձանագրվել կամ հաղորդվել է նավերի դեմ 28 հարձակման մասին։ Սա ամենաբարձր ամսական ցուցանիշն է փետրվարի 28-ին Իրանի դեմ ԱՄՆ-ի և Իսրայելի պատերազմի սկսվելուց ի վեր, հաղորդում է Reuters-ը։