Մարտունիում իրավապահները գործողություններ են իրականացրել «Մեր համայնք» դաշինքի ղեկավարների, այդ թվում՝ դաշինքի առաջնորդ, ՀՀԿ Մարտունու շրջանային կազմակերպության ղեկավար Արամ Կարապետյանի նկատմամբ։ Այս մասին հայտարարություն է տարածել Հայաստանի Հանրապետական կուսակցությունը (ՀՀԿ)։
Կուսակցության տարածած հաղորդագրության մեջ ասվում է՝ ընտրություններից մեկ օր առաջ ընդդիմադիր գործիչների նկատմամբ նման գործողությունները կասկածի տակ են դնում ազատ և արդար ընտրություններ ապահովելու վերաբերյալ իշխանությունների հայտարարությունները։
«Փաշինյանը պետք է հասկանա՝ Մարտունին սեփական իշխանությունը պահելու փորձադաշտ չէ, իսկ ընդդիմադիրներին կալանավորելով՝ հնարավոր չէ խուսափել քաղաքական պատասխանատվությունից»,- ասված է ՀՀԿ-ի հայտարարության մեջ։
Հակակոռուպցիոն կոմիտեից հայտնում են, որ Հայաստանի մի շարք համայնքներում ընտրական բնույթի կոռուպցիոն հանցագործությունների դեպքերով նախաձեռնված քրեական վարույթների շրջանակում իրականացվում են ապացուցողական և այլ վարութային գործողություններ։ Կոմիտեից հաստատել են, որ կան ձերբակալված անձինք։
Հոկտեմբերի 25-ին Հայաստանի 21 համայնքում տեղի կունենան տեղական ինքնակառավարման մարմինների ընտրություններ։
Հոկտեմբերի 24-ի առավոտյան Արթիկ համայնքում բերման են ենթարկվել «Ապրելու երկիր» կուսակցության համայնքապետի թեկնածու Արթուր Աստոյանը և նրա մի շարք թիմակիցներ։ Այս մասին հայտնել է կուսակցության նախագահ Մանե Թանդիլյանը։
«Հայրենիք» կուսակցության համայնքապետի թեկնածու Լևոն Վահրադյանն էլ «Ազատության» հետ զրույցում հաստատել է, որ իրենց թիմակիցներից ևս կան բերման ենթարկվածներ, որոնք գտնվում են Հակակոռուպցիոն կոմիտեում։
Ընտրություններից օրեր առաջ ձերբակալություններ են իրականացվել նաև Ստեփանավանում։ Հոկտեմբերի 21-ին ընտրակաշառքի գործով ձերբակալվել էր 14 անձ, այդ թվում՝ «Ուժեղ Հայաստան» կուսակցության համայնքապետի թեկնածու Արսեն Գևորգյանը։ Վերջինս կալանավորվել է երկու ամսով։
Հոկտեմբերի 23-ին Հակակոռուպցիոն կոմիտեն հայտնել է, որ նույն քրեական վարույթի շրջանակում ևս 10 անձ է ձերբակալվել։ Ընդհանուր 24 անձի մեղադրանք է ներկայացվել ընտրակաշառք տալու, դրան օժանդակելու և ընտրակաշառք ստանալու համար։
Պատմություններ
