Երևանի պետական համալսարանի (ԵՊՀ) երկու ամբիոնների վարիչներ՝ Վարդան Այվազյանը և Էդիկ Մինասյանը, ձերբակալվել են կաշառքի գործով։ Հակակոռուպցիոն կոմիտեում նախաձեռնված քրեական վարույթի շրջանակում ընդհանուր առմամբ չորս անձ է ձերբակալվել։ Այս մասին հայտնել են Հակակոռուպցիոն կոմիտեից։
Ըստ կոմիտեի՝ ԵՊՀ իրավագիտության ֆակուլտետի սահմանադրական իրավունքի ամբիոնի վարիչ Վարդան Այվազյանը ձերբակալվել է կաշառք ստանալու, իսկ պատմության ֆակուլտետի հայոց պատմության ամբիոնի վարիչ Էդիկ Մինասյանը՝ կաշառք ստանալուն օժանդակելու մեղադրանքով։
Հակակոռուպցիոն կոմիտեն, վկայակոչելով նախաքննության շահերը, այլ մանրամասներ չի հրապարակել։ Չի հստակեցվել, թե ինչ հանգամանքներում են ենթադրաբար կատարվել հանցագործությունները, ովքեր են մյուս երկու ձերբակալվածները, և արդյոք նրանց նկատմամբ նույնպես քրեական հետապնդում է հարուցվել։
Ձերբակալված անձանց նկատմամբ գործում է անմեղության կանխավարկածը։
Պատմություններ
