Կարեն Ասլանյանը՝ հունահռոմեական ըմբշամարտի աշխարհի չեմպիոն

Հայաստանի հունահռոմեական ոճի ըմբշամարտի հավաքականի անդամ Կարեն Ասլանյանը հռչակվել է աշխարհի չեմպիոն։ Աստանայում ընթացող աշխարհի առաջնության եզրափակչում հայ ըմբիշը 8։4 հաշվով հաղթել է Ադրբեջանի ներկայացուցիչ Նիհատ Մամմադլիին՝ նվաճելով ոսկե մեդալը։ Այս մասին հայտնում է ԿԳՄՍ նախարարությունը։

Ասլանյանը մրցաշարի ընթացքում հաղթել է նաև Ռումինիայի (10։0), Ղրղզստանի (8։0), Ուզբեկստանի (9։0) ներկայացուցիչներին, իսկ կիսաեզրափակչում 12։4 հաշվով առավելության է հասել Բուլղարիան ներկայացնող Էդմոնդ Նազարյանի նկատմամբ։

Հայաստանի հավաքականի մյուս անդամ Գևորգ Թադևոսյանը (87 կգ) նվաճել է բրոնզե մեդալ՝ երրորդ տեղի համար գոտեմարտում 4։1 հաշվով հաղթելով ուկրաինացի Յարոսլավ Ֆիլչակովին։

Բրոնզե մեդալի համար պայքարել է նաև Սլավիկ Գալստյանը (67 կգ), սակայն 6։8 հաշվով պարտվել է Կուբայի ներկայացուցիչ Օրտա Սանչեսին։

Հայաստանի հունահռոմեական ոճի ըմբշամարտի հավաքականն աշխարհի առաջնությունն ավարտել է մեկ ոսկե և մեկ բրոնզե մեդալով։