Նոր սերնդի կենսաչափական անձնագրերի և նույնականացման քարտերի տրամադրման համար նախատեսված գրասենյակներում արդեն ավելի քան 1300 այց է ամրագրվել։
Այս մասին հայտարարել է ներքին գործերի նախարար Արփինե Սարգսյանը՝ հոկտեմբերի 31-ին նոր սերնդի կենսաչափական համակարգի գործարկման միջոցառման ժամանակ։ Հայաստանում նոր փաստաթղթերի տրամադրումը կմեկնարկի նոյեմբերի 1-ից։
Սարգսյանի խոսքով՝ նոր համակարգի արտադրական գործընթացն արդեն մեկնարկել է, իսկ նույն օրը բացվել է նաև տվյալների կենտրոնը։ Նա նշել է, որ համակարգի ներդրումն իրականացվում է պետական-մասնավոր գործընկերությամբ՝ ֆրանսիական IN Groupe ընկերության և ամերիկյան միջազգային ընկերության մասնակցությամբ։
Վարչապետ Նիկոլ Փաշինյանի խոսքով՝ IN Groupe կոնսորցիումը կառավարելու է համակարգը և ստանձնելու է կենսաչափական անձնագրերի տրամադրման գործընթացի սպասարկումը։
Փաշինյանն ընդգծել է, որ կենսաչափական անձնագրերի ներդրումը կարևոր նշանակություն ունի Եվրամիության հետ վիզաների ազատականացման շուրջ բանակցությունների հաջող ավարտի համար։
Կենսաչափական անձնագրերով սահմանային ավտոմատացված անցման համակարգը նախ կներդրվի «Զվարթնոց» օդանավակայանում, այնուհետև՝ Հայաստանի մյուս սահմանային անցակետերում։
Խոսքը e-gate (էլեկտրոնային դարպասներ) համակարգի մասին է։ Այն թույլ է տալիս կենսաչափական անձնագրերի միջոցով ավտոմատ անցնել սահմանային ստուգումը՝ առանց սահմանապահի կողմից փաստաթղթի ձեռքով ստուգման։
Նոյեմբերի 1-ից նոր կենսաչափական անձնագրի արժեքը 28 հազար 650 դրամ կլինի, իսկ նույնականացման քարտինը՝ 5 հազար 950 դրամ։
Սկզբնական փուլում «ՀայՓաս» ընկերությունը կգործարկի 14 սպասարկման գրասենյակ։ 2027 թվականի առաջին եռամսյակում դրանց թիվը նախատեսվում է հասցնել 23-ի։
Պատմություններ
