Նոյեմբերի 4-ին՝ ժամը 14։00-ին, Երևանի Ավան և Նոր Նորք վարչական շրջանների ընդհանուր իրավասության դատարանում կքննվի Գագիկ Ծառուկյանի նկատմամբ կիրառված խափանման միջոցը փոխելու հարցը։ Այս մասին հայտնում է «Բարգավաճ Հայաստան» կուսակցությունը։
Դատական նիստը տեղի կունենա քրեական գործի շրջանակում, որով մեղադրյալներ են Գագիկ Ծառուկյանը, Սեդրակ Առուստամյանը, Արթուր Դալլաքյանը և այլ անձինք։
ԲՀԿ-ն հայտարարում է, որ կուսակղցության առաջնորդ Գագիկ Ծառուկյանն ու գործով մյուս մեղադրյալները քաղաքական հետապնդման թիրախ են։
Կուսակցությունը նշում է, որ նախաքննությունն ավարտվել է, գործն ուղարկվել է դատարան, ուստի Ծառուկյանին կալանքի տակ պահելու անհրաժեշտություն այլևս չկա։
«Հաշվի առնելով վերոնշյալ բոլոր հանգամանքները՝ մենք ակնկալում ենք, որ դատարանը կկայացնի հավասարակշռված, արդար և օրինական որոշում՝ Գագիկ Ծառուկյանի նկատմամբ կիրառված խափանման միջոցը փոխարինելով այլ տարբերակով»,- ասված է կուսակցության հայտարարությունում։
ԲՀԿ-ն պահանջում է Ծառուկյանի անհապաղ ազատ արձակումը՝ հայտարարելով, որ շարունակելու է պայքարը նրա և գործով մյուս մեղադրյալների իրավունքների պաշտպանության համար։
Գագիկ Ծառուկյանը կալանավորվել է հուլիսի 7-ին։ Նրան մեղադրանք է առաջադրվել առանձնապես խոշոր չափերով խարդախության և փողերի լվացման համար։ Հետագայում մեղադրանքներն ընդլայնվել են՝ ներառելով նաև շորթման դրվագ։ Ծառուկյանն ու իր թիմակիցները սա համարում են քաղաքական հետապնդում
Պատմություններ
