Հայաստանը, ԱՄՆ-ն և Ադրբեջանը հայտարարել են TRIPP նախագծի շրջանակում եռակողմ տեխնիկական պլանավորման առաջին երկու խմբերի աշխատանքների մեկնարկի մասին։
Դրանք կաշխատեն տրանսպորտի և էլեկտրաէներգիայի հաղորդման ուղղություններով։ Այս մասին ասվում է նոյեմբերի 7-ին Հայաստանի արտաքին գործերի և միջազգային առևտրի նախարարության հրապարակած համատեղ հայտարարությունում։
Աշխատանքների մեկնարկի մասին հայտարարել են ԱՄՆ պետքարտուղարի՝ Եվրոպայի և Եվրասիայի հարցերով օգնական Բրենդան Հանրահանը, Հայաստանի արտաքին գործերի և միջազգային առևտրի նախարարի տեղակալ Վահան Կոստանյանը և Ադրբեջանի արտաքին գործերի նախարարի տեղակալ Էլնուր Մամեդովը։
Ըստ հայտարարության՝ ձևաչափը միավորում է երեք երկրների քաղաքականություն մշակողներին և տեխնիկական փորձագետներին։ Խմբերը պետք է զբաղվեն տեխնիկական հարցերի լուծմամբ և նախագծի իրականացման հաջորդ փուլերի նախապատրաստմամբ, այդ թվում՝ տարածաշրջանային այլ ենթակառուցվածքների հետ կապի ապահովման հարցերով։
Կողմերը վերահաստատել են TRIPP-ի բոլոր բաղադրիչները հնարավորինս սեղմ ժամկետներում գործարկելու հանձնառությունը։
«Թրամփի ուղի՝ հանուն միջազգային խաղաղության և բարգավաճման» (TRIPP/Trump Route for International Peace and Prosperity) նախագիծը բխում է 2025 թվականի օգոստոսի 8-ին Վաշինգտոնում ԱՄՆ նախագահ Դոնալդ Թրամփի մասնակցությամբ ձեռք բերված հայ-ադրբեջանական պայմանավորվածություններից։ Այն նախատեսում է Հայաստանի տարածքով տարանցիկ կապ ապահովել Ադրբեջանի հիմնական մասի և Նախիջևանի միջև՝ միաժամանակ ընդլայնելով Հայաստանի միջազգային ու ներպետական հաղորդակցությունները։
2026 թվականի մայիսին հրապարակված հայ-ամերիկյան շրջանակային համաձայնագրով ամրագրված է, որ Հայաստանը պահպանում է լիակատար ինքնիշխանությունն ու իրավազորությունը իր տարածքում ԹՐԻՓՓ-ի իրականացման բոլոր գոտիների նկատմամբ։
Պատմություններ
