Հայաստանի ֆուտբոլի ֆեդերացիան (ՀՖՖ) 2027-ի մարտին կայանալիք ՖԻՖԱ-ի նախագահի ընտրություններում կաջակցի Ֆրանսիայի ֆուտբոլի ֆեդերացիայի նախագահ Ֆիլիպ Դիալլոյի թեկնածությանը, հայտնում են ՀՖՖ-ից։
Նոյեմբերի 16-ին ՈՒԵՖԱ-ի նախագահ Ալեքսանդր Չեֆերինի գլխավորությամբ կայացած գործադիր կոմիտեի նիստում որոշում է ընդունվել աջակցել Դիալլոյի թեկնածությանը։ Ըստ ֆեդերացիայի հաղորդագրության՝ որոշմանը միաձայն հավանություն են տվել ՈՒԵՖԱ-ի գործադիր կոմիտեի բոլոր անդամները, այդ թվում՝ ՀՖՖ նախագահ Արմեն Մելիքբեկյանը, ինչպես նաև ՖԻՖԱ-ի խորհրդի բոլոր եվրոպական անդամները։
ՀՖՖ նախագահ Արմեն Մելիքբեկյանը, անդրադառնալով որոշմանը, հայտարարել է, որ Դիալլոն ունի ՖԻՖԱ-ն ղեկավարելու համար անհրաժեշտ բոլոր որակները։
«Լավ ճանաչում եմ պարոն Դիալլոյին որպես բարձրակարգ և պրոֆեսիոնալ պաշտոնյա ՈՒԵՖԱ-ի գործադիր կոմիտեում համատեղ աշխատանքից։ Վստահ եմ, որ նա ունի անհրաժեշտ բոլոր որակները ՖԻՖԱ-ն գլխավորելու և այն հաջողությամբ ղեկավարելու համար»,- ասել է Մելիքբեկյանը։
Այս տարվա օգոստոսին ՀՖՖ-ն նամակ էր ուղարկել ՖԻՖԱ՝ տեղեկացնելով, որ 2027-ի նախագահական ընտրություններում չի աջակցելու կազմակերպության գործող նախագահ Ջիանի Ինֆանտինոյի թեկնածությանը։












