Թուրքիայի Անթալիա քաղաքում անցկացված COP31 կլիմայական գագաթնաժողովը նոյեմբերի 22-ին ավարտվեց առանց վերջնական համաձայնագրի։ Երկշաբաթյա բանակցություններից և լրացուցիչ երկու օր տևած քննարկումներից հետո մասնակից երկրներին չի հաջողվել համաձայնության գալ հանածո վառելիքի հարցում, հաղորդում է ՄԱԿ-ի լրատվական ծառայությունը։
Հիմնական տարաձայնությունը նավթի, գազի և քարածխի օգտագործումից հրաժարվելու պարտավորությունների շուրջ էր։ Եվրամիությունը, Պանաման և Մարշալյան կղզիներն առարկել են եզրափակիչ փաստաթղթի նախագծին՝ պնդելով, որ այն թուլացնում է նախկինում ձեռք բերված պայմանավորվածությունները։ Եվրամիության համար անընդունելի էր, որ փաստաթղթում որևէ հիշատակում չկար հանածո վառելիքի և դրանից հրաժարվելու մասին։
Տես՝ Թուրքիայում կլիմայական գագաթնաժողովը փակուղի է մտել։
COP31-ի նախագահ, Թուրքիայի շրջակա միջավայրի նախարար Մուրաթ Քուրումը եզրափակիչ նիստում հայտարարել է, որ համաձայնություն ձեռք չի բերվել, ուստի որոշումները չեն ընդունվել։
ՄԱԿ-ի գլխավոր քարտուղար Անտոնիու Գուտերեշը խոր հիասթափություն է հայտնել բանակցությունների արդյունքների կապակցությամբ։
Գուտերեշը զգուշացրել է, որ գլոբալ ջերմաստիճանը շարունակում է բարձրանալ, իսկ աշխարհը գնում է դեպի տաքացման՝ 1,5°C սահմանաչափի գերազանցում։ Նա կոչ է արել արագացնել հանածո վառելիքից անցումը և ավելացնել զարգացող երկրներին տրամադրվող կլիմայական ֆինանսավորումը։
Կլիմայական հաջորդ՝ COP32 գագաթնաժողովը կանցկացվի Եթովպիայի մայրաքաղաք Ադիս Աբեբայում, որտեղ երկրները կրկին կքննարկեն Անթալիայում չլուծված հարցերը։
COP31-ը ՄԱԿ-ի Կլիմայի փոփոխության մասին շրջանակային կոնվենցիայի կողմերի 31-րդ համաժողովն է։ Այն ամենամյա միջազգային հանդիպում է, որի ընթացքում երկրները բանակցում են գլոբալ տաքացումը սահմանափակելու, ջերմոցային գազերի արտանետումները կրճատելու և կլիմայի փոփոխության հետևանքների դեմ պայքարի ֆինանսավորման շուրջ։











