Civilnet
Մայր Աթոռ Սուրբ Էջմիածնում hուլիսի 26-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է ՀՀ-ում Սիրիայի Արաբական Հանրապետության գործերի ժամանակավոր հավատարմատար Իսսամ Նայալին, հաղորդում են Մայր Աթոռի մամուլի դիվանից:
Հանդիպմանը Նորին Սրբությունը մտահոգությամբ է անդրադարձել Սիրիայում տիրող իրավիճակին` խորին ցավ հայտնելով հակամարտության հետևանքով Սիրիայի ժողովրդի կրած կորուստների և պատճառված ավերածությունների համար: Վեհափառ Հայրապետը նշել է, որ Հայոց եկեղեցին շարունակելու է իր զորակցությունը բերել ծանր կացության մեջ գտնվող Սիրիայի ժողովրդին: Ամենայն Հայոց Կաթողիկոսը վստահություն է հայտնել, որ Աստծու օգնականությամբ Սիրիայում խաղաղություն ու համերաշխություն կհաստատվի և Սիրիայի աստվածասեր ժողովուրդը կվերագտնի իր բնականոն կյանքի ընթացքը:
Իր հերթին տիար Իսսամ Նայալը Սիրիայի ժողովրդի անունից երախտագիտություն է հայտնել հայ ժողովրդին և Հայոց եկեղեցուն ցուցաբերած մարդասիրական օգնության համար: Սիրիայի գործերի ժամանակավոր հավատարմատարը Նորին Սրբությանն է փոխանցել նաև Սիրիայի գլխավոր մուֆթի շեյխ Ահմադ Բադր ադ Դին Հասսունի ողջույնները:
Վերջում Վեհափառ Հայրապետը, վերստին կարևորելով երկու ժողովուրդների դարավոր բարեկամական հարաբերությունների ամրապնդումը, Սիրիայի գործերի ժամանակավոր հավատարմատարին արդյունավոր առաքելություն է մաղթել Հայաստանում:
Պատմություններ
