Ասադի վարչակազմը օգտահաշիվ է բացել Instagram-ում

Սիրիայի նախագահ Բաշար ալ Ասադի վարչակազմը նրա համար օգտահաշիվ է բացել Instagram ֆոտոծառայությունում։ Այնտեղ ներբեռնված են լուսանկարներ Սիրիայի նախագահի և նրա կնոջ տարբեր հանդիպումներից։

Այս պահին օգտահաշիվն ունի 2822 հետևող։

Սիրիայի նախագահը նաև ունի պաշտոնական էջ Facebook-ում և օգտահաշիվ՝ YouTube-ում։

Հիշեցնենք, որ Սիրիան 2011թ․ մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, 1,5 մլն մարդ փախստական է, 4 մլն մարդ՝ ներքին տեղահանված։