Դամասկոսում պայթյունի հետևանքով հայ է զոհվել

Սիրիայի մայրաքաղաք Դամասկոսի արվարձաններից մեկում` Ջարամանա շրջանի «Սիուֆ» հրապարակի մոտ, օգոստոսի 6-ին տեղի ունեցած ականապատ մեքենայի պայթյունի հետևանքով զոհվածների թվում է ազգությամբ հայ, 1966թ. ծնված Սարգիս Մերեսջյանը: Ինչպես հաղորդում է Լիբանանի «Ազդակ» օրաթերթը, պայթյունի պահին նա եղել է ավտոբուսում և մահացել է հենց դեպքի վայրում։ Պայթյունի հետևանքով զոհվել էր 18, վիրավորվել մոտ 50 մարդ:

Սիրիական ճգնաժամը շարունակվում է 2011թ․ մարտից։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է մոտ 100 հազ․ մարդ։ Տարբեր տվյալներով` զոհված սիրիահայերի թիվը հասնում է շուրջ 50-ի: