Civilnet
ՄԱԿ-ի Անվտանգության խորհուրդը հայտարարել է Դամասկոսի մերձակայքում քիմիական զենքի կիրառման դեպքերի մասին հաղորդագրությունները հետաքննելու անհրաժեշտության մասին, սակայն համապատասխան կարգադրությունները չի տվել միջազգային տեսուչներին, որոնք ներկայում գտնվում են Սիրիայում, հաղորդում է Reuters-ը:
«Խորհրդի անդամներին չափազանց անհանգստացրել են այդ հաղորդագրությունները: Ընդհանուր կարծիքն այն է, որ պետք է պարզել՝ ինչ է տեղի ունեցել և ուշադիր հետևել իրադրությանը», - լրագրողներին ասել է ՄԱԿ-ում Արգենտինայի մշտական ներկայացուցիչ Մարիա Քրիստինա Պերսևելը Խորհրդի արտահերթ փակ նիստից հետո:
BBC-ի հաղորդմամբ` Անվտանգության խորհրդի արտահերթ նիստի ժամանակ ներկայացվել է հայտարարության նախագիծ, որում վճռականորեն պահանջվում է ՄԱԿ-ի փորձագետներին տալ անսահմանափակ մուտք Դամասկոսի արևելքում գտնվող Ղուտայի օազիս: Սակայն Ռուսաստանն ու Չինաստանը արգելափակել են այդ հայտարարության ընդունումը:
Օգոստոսի 21-ին Սիրիայի ընդդիմությունը հայտարարել էր, որ Դամասկոսի արվարձանում կառավարական ուժերի գործողությունների ընթացքում քիմիական զենք է կիրառվել, որի արդյունքում, ընդդիմության պնդմամբ, ավելի քան հազար մարդ է զոհվել: Պաշտոնական Դամասկոսն այդ լուրերը հերքում է: 35 երկիր, այդ թվում՝ ԱՄՆ-ն, Բրիտանիան և Ֆրանսիան, կոչ են արել Սիրիայում քիմիական զենքի հարցերով ՄԱԿ-ի գլխավոր տեսուչ Ակե Սելստրեմին որքան հնարավոր է արագ հետաքննել տեղի ունեցածը:
Պատմություններ
