Civilnet
Բրիտանական խորհրդարանը օգոստոսի 29-ի լույս 30-ի գիշերը մերժել է վարչապետ Դևիդ Քեմերոնի առաջարկը Սիրիայում հնարավոր ռազմական օպերացիային մասնակցելու վերաբերյալ, հաղորդում է BBC-ն:
Կառավարության նախաձեռնության դեմ քվեարկել է Համայնքների պալատի 285 պատգամավոր, կողմ հանդես են եկել 272-ը:
Քվեարկությունից հետո վարչապետ Քեմերոնը հայտարարել է, որ ակնահյտ է դարձել Սիրիայում որևէ ռազմական գործողություններ սկսելու հարցում խորհրդարանի դժկամությունը:
Բրիտանիայի պաշտպանության նախարար Ֆիլիպ Համոնդը BBC Newsnight հեռուստահաղորդման ժամանակ հաստատել է, որ Մեծ Բրիտանիան չի մասնակցելու Սիրիայում ռազմական օպերացիային:
ԱՄՆ-ն, այդուհանդերձ, ակնարկել է, որ նախկինի պես պատրաստ է գործողություններ ծավալել Սիրիայում՝ անգամ առանց Բրիտանիայի մասնակցության, սակայն շարունակելու է խորհրդակցել Լոնդոնի հետ, որը մնում է Վաշինգտոնի «ամենամտերիմ դաշնակիցն ու բարեկամը»:
«Որոշում ընդունելիս նախագահ Բարաք Օբաման առաջնորդվելու է ԱՄՆ-ի շահերով», - ասված է Սպիտակ տան հայտարարության մեջ:
Պատմություններ
