Civilnet
Ռուսական «Վնեշէկոնոմբանկը», որին ամերիկյան սենատորները մեղադրել են սիրիական իշխանություններին ֆինանսավորելու մեջ, հայտարարել է, որ Սիրիայի Կենտրոնական բանկի հետ որևէ գործարքներ չի իրականացնում, հաղորդում է «Ռիա Նովոստին»:
«Վնեշէկոնոմբանկի» ներկայացուցիչները ռուսական BBC-ին տեղեկացրել են, որ բանկի գործունեությունը վարվում է պատժամիջոցների շրջանակում, որոնք Սիրիայի նկատմամբ սահմանել են Եվրամիությունն ու ՄԱԿ-ը:
«Բանկը որևէ առևտրային գործարքներ չի իրականացնում Սիրիայի Կենտրոնական բանկի, նրա կառավարության կամ վերջինների կողմից վերահսկվող կազմակերպությունների հետ», - ասված է ՎԷԲ-ի հայտարարության մեջ:
Ավելի վաղ ամերիկացի չորս սենատորներ դիմել էին ԱՄՆ ֆիննախարարության ղեկավարին՝ պահանջելով պատժամիջոցներ սահմանել ռուսական մի շարք բանկերի նկատմամբ, որոնցում, սենատորների պնդմամբ, իրենց ակտիվներն են պահում Ասադի մերձավորները:
Ավելի վաղ ռուսական «ՎՏԲ» բանկը նույնպես հերքել էր ամերիկացի սենատորների՝ բանկում Ասադի վարչակարգի ներկայացուցիչների հաշիվների առկայության մասին պնդումները՝ դրանք որակելով սադրիչ:
Պատմություններ
