Civilnet
ՄԱԿ-ի անվտանգության խորհրդի մշտական անդամները՝ Ռուսաստանը, Չինաստանը, Ֆրանսիան, ԱՄՆ-ն և Մեծ Բրիտանիան, Սիրիայի քիմիական զենքի ոչնչացման վերաբերյալ բանաձևի ընդունման միասնական որոշում են կայացրել, հայտարարել են ՄԱԿ-ի դիվանագետները։
Ինչպես հաղորդում է BBC-ն, ավելի վաղ համաշխարհային կազմակերպության գրասենյակում, որտեղ շարունակվում է ՄԱԿ-ի Գլխավոր ասամբելայի 68-րդ նստաշրջանը, տեղի են ունեցել ԱԽ մշտական անդամ երկրների արտգործնախարարների մի շարք հանդիպումներ։
Մինչ այդ ՌԴ փոխարտգործնախարար Սերգեյ Ռյաբկովը հայտարարել էր, որ Սիրիայի հարցով ՄԱԿ-ի Անվտանգության խորհրդի բանաձևի տեքստը հնարավոր է՝ համաձայնեցվի ընթացիկ շաբաթվա ընթացքում։
Այն մասին, որ բանաձևի նախագիծը գրեթե պատրաստ է, հայտարարել էր նաև Ֆրանսիայի արտգործնախարար Լորան Ֆաբիուսը, ՄԱԿ-ում Մեծ Բրիտանիայի մշտական ներկայացուցիչ Մարք Լայալ Գրանտը և ԱՄՆ վարչակազմի ներկայացուցիչը։
Հիշեցնենք, Ռուսաստանն ու ԱՄՆ-ն եռօրյա բանակցությունների արդյունքում սեպտեմբերի 14-ին համաձայնության էին եկել սիրիական քիմիական զենքի պաշարները մինչև 2014թ․ կեսը ոչնչացնելու շուրջ։
Պատմություններ
