Civilnet
Սիրիայում առնվազն 19 ընդդիմադիր իսլամիստական խմբավորումներ մերժել են մասնակցել Սիրիայի ճգնաժամի կարգավորման հարցերով «Ժնև-2» խաղաղ համագումարի, հաղորդում է AFP-ն:
«Մենք հայտարարում ենք, որ «Ժնև-2» համագումարը չի հանդիսանում և երբեք չի հանդիսանա մեր ժողովրդի կամ մեր հեղափոխական պահանջների ընտրությունը»,- ասել է Սիրիական ազատ բանակի կազմի մեջ մտնող «Սաքյուր ալ Շամ» խմբավորման առաջնորդ Ահմադ Իսա ալ Շեյխը:
Ներկայում տարվում են Սիրիայի ճգնաժամի խաղաղ կարգավորման հարցով «Ժնև-2» համաժողովի նախապատրաստական աշխատանքներ: Ավելի վաղ Արաբական պետությունների լիգայի (ԱՊԼ) գլխավոր քարտուղար Նաբիլ ալ Արաբին հայտնել էր, որ «Ժնև-2»-ը տեղի կունենա նոյեմբերի 23-ին: Ալ Արաբիի խոսքով՝ այդ մասին նրան տեղեկացրել է ՄԱԿ-ի և ԱՊԼ-ի հատուկ ներկայացուցիչ Լահդար Բրահիմին:
Հիշեցնենք, որ Սիրիան 2011թ․ մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2 մլն սիրիացի, ևս 4 մլն սիրիացի համարվում է ներքին տեղահանված։
Պատմություններ
