ՄԱԿ-ի բանագնաց Բրահիմին հոկտեմբերի 30-ին կհանդիպի Ասադի հետ

ՄԱԿ-ի և Արաբական պետությունների լիգայի՝ սիրիական ճգնաժամի կարգավորման հարցերով հատուկ բանագնաց Լախդար Բրահիմին հոկտեմբերի 30-ին մտադիր է Դամասկոսում հանդիպել Սիրիայի նախագահ Բաշար ալ Ասադի հետ` քննարկելու սիրիական խնդրի քաղաքական կարգավորմանն ուղղված միջազգային երկրորդ համաժողովը՝ Ժնև-2-ը, որը ծրագրվում է անցկացնել նոյեմբերին: Այս մասին հաղորդում է AFP-ն` վկայակոչելով իր աղբյուրը:

Նախօրեին Բրահիմին Դամասկոսում հանդիպել է սիրիական ընդդիմության ներկայացուցիչների, ինչպես նաև Սիրիայի արտգործնախարար Ուալիդ Մուալլեմի հետ:

Ժնև-2 համաժողովի անցկացման նախաձեռնությունը Ռուսաստանինն ու Միացյալ Նահանգներինն է: Այն պետք է դառնա Ժնևում 2012թ․ հունիսի 30-ի հանդիպման շարունակությունը։ Համաժողովն ի սկզբանե նախատեսվում էր անցկացնել հունիսի սկզբին: Նոյեմբերի 5-ին Բրահիմին Ժնև-2-ի հարցով եռակողմ հանդիպում կանցկացնի Ռուսաստանի և ԱՄՆ-ի բարձրաստիճան դիվանագետների հետ: Նույն օրը Ռուսաստանի և ԱՄՆ-ի պաշտոնատար անձինք Բրահիմիի միջնորդությամբ, կհանդիպեն ՄԱԿ-ի Անվտանգության խորհրդի մյուս մշտական անդամ երկրների ներկայացուցիչների հետ` քննարկելու խաղաղ համաժողովի անցկացումը:

Հիշեցնենք, որ Սիրիան 2011թ․ մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2 մլն սիրիացի, ևս 4 մլն սիրիացի համարվում է ներքին տեղահանված։