Civilnet
ՄԱԿ-ի գլխավոր քարտուղար Բան Կի Մունը հայտարարել է, որ սիրիական խնդրի քաղաքական կարգավորմանն ուղղված միջազգային երկրորդ համաժողովը՝ Ժնև-2-ը, կգումարվի 2014թ. հունվարի 22-ին: Այս մասին հաղորդում է BBC-ն՝ վկայակոչելով ՄԱԿ-ի հայտարարությունը:
«Տառապանքին ու ավերածությանը վերջ դնելու հնարավորությունից չօգտվելն աններելի կլիներ»,- ասված է ՄԱԿ-ի հայտարարությունում:
Փաստաթղթում չի հաղորդվում՝ մասնակցելու է արդյոք համաժողովին Իրանը՝ Սիրիայի նախագահ Բաշար ալ Ասադի հիմնական դաշնակիցը տարածաշրջանում:
Սիրիական ընդդիմությունը պնդում է, որ Սիրիայի նախագահը պետք է իր պաշտոնը լքի նախքան բանակցությունների մեկնարկը:
Ժնև-2 համաժողովի անցկացման նախաձեռնությունը Ռուսաստանինն ու Միացյալ Նահանգներինն է: Այն պետք է դառնա Ժնևում 2012թ․հունիսի 30-ի հանդիպման շարունակությունը։ Ի սկզբանե ծրագրվում էր այն անցկացնել հունիսի սկզբին։
Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2,8 մլն սիրիացի, ևս 6,5 մլն սիրիացի համարվում է ներքին տեղահանված։
Պատմություններ
