ԵՄ-ն դեմ է Ժնև-2-ի հետաձգմանը

Եվրոպական Միությունը հույս է հայտնել, որ Ժնևում 2014թ. հունվարին ծրագրված համաժողովը կկայանա հունվարի 22-ին, ինչպես նախապես ծրագրվել էր: Այս մասին հայտարարել է ԵՄ արտաքին քաղաքականության և անվտանգության հարցերով բարձր ներկայացուցիչ Քեթրին Էշթոնի խոսնակ Մայա Կոսյանչիչը:

«Մենք շարունակում ենք նախապատրաստվել Ժնև-2-ին, որը ծրագրված է հունվարի 22-ին»,- Բրյուսելում լրագրողներին ասել է Կոսյանչիչը: Նրա խոսքով` ԵՄ-ի բոլոր ջանքերն ուղղված են նրան, որ համաժողովը կայանա և հաջողվի գտնել սիրիական հակամարտության կարգավորման լուծումը:

Ավելի վաղ Սիրիական հեղափոխական և ընդդիմադիր ուժերի ազգային կոալիցիայի նախագահ Ահմեդ ալ-Ջարբան հանդես էր եկել համաժողովը հետաձգելու օգտին` առաջարկը հիմնավորելով բանակցությունների անցկացման համար բարենպաստ պայմանների ստեղծման անհրաժեշտությամբ:

Նոյեմբերի 25-ին ՄԱԿ-ի գլխավոր քարտուղար Բան Կի Մունը հայտարարեց, որ սիրիական խնդրի քաղաքական կարգավորմանն ուղղված միջազգային երկրորդ համաժողովը՝ Ժնև-2-ը, կգումարվի 2014թ. հունվարի 22-ին։

Ժնև-2 համաժողովի անցկացման նախաձեռնությունը Ռուսաստանինն ու Միացյալ Նահանգներինն է: Այն պետք է դառնա Ժնևում 2012թ․հունիսի 30-ի հանդիպման շարունակությունը։ Ի սկզբանե ծրագրվում էր այն անցկացնել հունիսի սկզբին։

Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2,8 մլն սիրիացի, ևս 6,5 մլն սիրիացի համարվում է ներքին տեղահանված։