Սիրիայում պայթյունի հետևանքով 9 մարդ զոհվել է

Սիրիայի հյուսիսում՝ դաշտային հիվանդանոցի մոտակայքում, ականապատված ավտոմեքենա է պայթել, հաղորդում է BBC-ն:

Պայթյունի հետևանքով, որը տեղի է ունեցել թուրք-սիրիական սահմանին գտնվող Աթմեհ քաղաքում, զոհվել է 9 մարդ: Աթմեհում բնակվում են մոտ 30 հազ. սիրիացիներ, որոնք հիմնականում ներքին տեղահանվածներ են:

Հատկանշական է, որ փետրվարի 22-ին ՄԱԿ-ի Անվտանգության խորհուրդը սիրիական հակամարտության բոլոր կողմերին կոչ է արել անհապաղ վերացնել բնակավայրերի, այդ թվում, Հոմս քաղաքի հին թաղամասի, Նաբուլի և Զահրայի, Մադամիեթ Էլշամի և մյուս թաղամասերի շրջափակումը: 

ՄԱԿ-ի Անվտանգության խորհուրդը պահանջել է նաև վերացնել քաղաքացիների գոյատևման համար անհրաժեշտ սննդի և դեղամիջոցների արգելքը:

Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2,3 մլն սիրիացի, ևս 6,5 մլն սիրիացի համարվում է ներքին տեղահանված։