Հալեպում հզոր պայթյունի հետևանքով հյուրանոցը գետնին է հավասարվել

Սիրիայի Հալեպ քաղաքի հյուսիսում հզոր պայթյուն է տեղի ունեցել, որի հետևանքով հողին է հավասարեցվել հյուրանոցը և մի քանի շինություն, հաղորդում է սիրիական SANA պետական գործակալությունը:

Ռումբը տեղադրված է եղել հյուրանոցի տակ փորված թունելում: Carlton Citadel Hotel-ը տեղակայված է շինությունում, որը կառուցվել է 150 տարի առաջ և գտնվում է Ցիտադելի մոտ՝ միջնադարյանի քաղաքից և հին շուկայից ոչ հեռու, որոնք ՅՈւՆԵՍԿՕ-ի Համաշխարհային ժառանգության ցուցակում են:

Ինչպես հաղորդում է BBC-ն, Լոնդոնում գործող սիրիական իրավապաշտպան կազմակերպությունը հայտնել է, որ հյուրանոցում կառավարական ուժեր են տեղակայված եղել, որոնցից շատերը զոհվել են պայթյունի հետևանքով:

 Վերջին շաբաթներին ապստամբները փորձում էին առաջանալ Հալեպի այն շրջանում, որտեղ կառավարական ուժերն են: Հնարավոր զոհերի մասին ստույգ տվյալներ դեռևս չկան:

Սիրիան 2011թ․մարտից ներքաղաքական ճգնաժամում է։ Երկրի ընդդիմությունը պահանջում է Սիրիայի նախագահ Բաշար ալ Ասադի պաշտոնաթողությունը՝ կառավարական ուժերին մեղադրելով խաղաղ բնակչության նկատմամբ զանգվածային բռնությունների իրագործման մեջ։ Պաշտոնական Դամասկոսը վստահեցնում է, որ ժողովրդավարական կարգախոսների քողի ներքո երկրում գործում են «զինված ահաբեկչական խմբավորումներ»։ Համաձայն ՄԱԿ-ի տվյալների՝ հակամարտության սկզբից ի վեր Սիրիայում զոհվել է ավելի քան 100 հազ․ մարդ, փախստական է 2,3 մլն սիրիացի, ևս 6,5 մլն սիրիացի համարվում է ներքին տեղահանված։