Civilnet
Լուսանկարում Իրաքի նախագահը (ձախից երկրորդը) Հայդեր ալ Աբադիին (աջից առաջինը) հանձնարարում է կառավարություն ձևավորել։
Իրաքի նախագահ Ֆուադ Մասումը օգոստոսի 11-ին երկրի խորհրդարանի փոխխոսնակ Հայդեր ալ Աբադիին հանձնարարել է նոր կառավարություն ձևավորել՝ այդպիսով անարգելով երկրի ժամանակավոր վարչապետ Նուրի Մալիքիին, որի «Օրենքի պետություն» կոալիցիան այս տարվա ապրիլին կայացած խորհրդարանական ընտրություններում ամենաշատ տեղերն էր ստացել, հաղորդում է BBC-ն։
ԱՄՆ նախագահ Բարաք Օբաման այս նշանակումն անվանել է «խոստումնալից քայլ առաջ»։ Նա խոստովանել է, որ Իրաքն այժմ դժվարին ժամանակներ է ապրում և երկրի քաղաքական առաջնորդներին կոչ է արել միասնաբար գործել։
Ինքը՝ Մալիքին, Աբադիի առաջադրումը բնորոշել է որպես «սահմանադրության խախտում», որը կհանգեցնի երկրում քաղաքական ճգնաժամի։ Հեռուստաուղերձում նա ասել է, որ «կուղղի այս սխալը»։
Իրաքում նոր կառավարության շուրջ քաղաքական մանևրումները տեղի են ունենում երկրի հյուսիսում իշխանությունների ու «Իրաքի և Շամի իսլամական պետություն» խմբավորման զինյալների միջև դիմակայության ֆոնին։ Խմբավորման զինյալները վերջին ամիսներին զգալի հաջողությունների են հասել Իրաքի հյուսիսում՝ ստիպելով կրոնական ու էթնիկ փոքրամասնությունների տասնյակ հազարավոր ներկայացուցիչների լքել իրենց տները։
ԱՄՆ-ի զինված ուժերը ավիահարվածներ են հասցնում Իրաքում իսլամիստների դիքերին, իսկ խաղաղ բնակիչներին սննդամթերք և ջուր են մատակարարում։
Շիա Նուրի Մալիքիի քննադատների խոսքով՝ հենց նա է նպաստել ներկա ճգնաժամի առաջացմանը իր նեղ դավանական քաղաքականության միջոցով։
«Իրաքի և Շամի իսլամական պետություն» խմբավորումը Սիրիայում Բաշար ալ Ասադի կառավարական ուժերի դեմ կռվող հիմնական խմբավորումներից մեկն է։ Այն զգալի տարածքներ է վերահսկում նաև արդեն ավելի քան երեք տարի ներքաղաքական ճգնաժամում գտնվող Սիրիայում, որտեղ ևս նախագահը նախօրեին հանձնարարել է նոր կառավարություն ձևավորել Ուաիլ ալ Հալկիին, որը երկրի վարչապետի պաշտոնը զբաղեցնում է 2012թ․ օգոստոսից։
Պատմություններ
