Civilnet
Սփյուռքի նախարարությունն աշխատանքներ է իրականացնում Ուկրաինայի շրջաններում և Իրաքում բնակվող սփյուռքահայերի՝ հայրենիք վերադարձը կազմակերպելու և նրանց սոցիալական տարբեր ծրագրերում ներգրավելու ուղղությամբ: Այս մասին փետրվարի 25-ին ասել է սփյուռքի նախարար Հրանուշ Հակոբյանը՝ վարչապետի մոտ հրավիրված խորհրդակցությանը ամփոփելով իր ղեկավարած կառույցի 2014թ. գործունեության արդյունքները:
Ինչպես հաղորդում են կառավարության մամուլի ծառայությունից, Հակոբյանը նշել է, որ 2014թ․ ընթացքում նախարարության գերակայություններից է եղել «արտակարգ իրավիճակներում հայտնված սիրիահայերի, այսօր արդեն նաև ուկրաինահայերի և իրաքահայերի հետ աշխատանքների համակարգումը»:
«Ներկայում «Հայաստանում է գտնվում 12 հազ-ից ավելի սիրիահայ, նրանց ցուցաբերվում է անհրաժեշտ օժանդակություն՝ կացարանի, կրթության, առողջապահական և այլ հարցերով»,- ասել է նախարարը:
Խոսելով «Արի տուն» ծրագրի մասին, որի շրջանակում Հայաստան են գալիս Սփյուռքի երիտասարդները, Հակոբյանը նշել է, որ 2014թ. նախատեսված մինչև 1000 մասնակցի փոխարեն հյուրընկալվել է 1071 երիտասարդ աշխարհի 31 երկրից: Առաջին անգամ ծրագրին մասնակցել է Դիարբեքիրից իսլամացած 50 հայերի խումբը:
Պատմություններ
