Civilnet
Եվրամիության առաջնորդների՝ փախստականների խնդրին նվիրված բրյուսելյան արտահերթ գագաթաժողովի ընթացքում որոշվել է միլիոնավոր սիրիացի փախստականներին օգնելու նպատակով մեկ մլրդ եվրո հատկացնել, հաղորդում է Euronews-ը:
Եվրոպական խորհրդի նախագահ Դոնալդ Տուսկը հայտարարել է, որ գումարը կփոխանցվի Թուրքիայում, Լիբանանում և Հորդանանում ՄԱԿ-ի ներկայացուցչություններին: Դոնալդ Տուսկը նաև տեղեկացրել է, որ մինչև նոյեմբերի վերջ Եվրամիության արտաքին սահմաններին կգործեն փախստականների ընդունման և գրանցման կենտրոններ: Տուսկի խոսքով՝ դեռ օրեր առաջ հակասական թվացող այս հարցի շուրջ գագաթաժողովին համաձայնություն է կայացվել:
«Մեր այսօրվա բանավեճը հիմնված էր փաստերի և ոչ թե զգացմունքների վրա: Սիրիայում այսօր կա ութ մլն ներքին տեղահանված, ևս չորս մլն՝ հարևան երկրներում: Միայն Սիրիայից կարող ենք ակնկալել միլիոնավոր փախստականների»,- ասել է Տուսկը:
Բրյուսելյան գագաթաժողովին մոտակա երկու տարում փախստականների քվոտաների հարցը չի քննարկվել: Սեպտեմբերի 22-ին ԵՄ 28 երկրների նախարարները հաստատել էին պետությունների միջև 120 հազ. փախստականների բաշխման պլանը, որի համաձայն՝ նրանք կտեղավորվեն ԵՄ բոլոր երկրներում՝ յուրաքանչյուրի քվոտայի համապատասխան:
Ամեն օր հազարավոր փախստականներ, գերազանցապես՝ սիրիացիներ, հատում են Եվրամիության սահմանները և փորձելով հասնել մայրցամաքի խորքը՝ ապաստան ստանալ Գերմանիայում կամ Շվեդիայում: ՄԱԿ-ի տվյալներով՝ այս տարի Եվրոպա ներգաղթածների թիվը հասնում է կեսմիլիոնի: Բրիտանիան չի մասնակցում փախստականների տեղակայման եվրոպական ծրագրին և ունի նրանց ընդունման սեփական պլանը: Բրիտանիայի վարչապետ Դևիդ Քեմերոնը հայտարարել է, որ իր կառավարությունը սիրիացի փախստականներին 100 մլն ֆունտի լրացուցիչ օգնություն կտրամադրի:
Պատմություններ
