Civilnet
Ռուսաստանի Դաշնության և Սիրիայի նախագահներ Վլադիմիր Պուտինն ու Բաշար Ասադը հոկտեմբերի 20-ի երեկոյան Մոսկվայում երկարատև բանակցություններ են վարել. այս մասին տեղեկացրել է ՌԴ նախագահի մամուլի խոսնակ Դմիտրի Պեսկովը:
Վերջինս տեղեկացրել է, որ սիրիացի առաջնորդի և ՌԴ նախագահի բանակցությունները տևել են բավական երկար՝ նեղ և ընդլայնված կազմով. Պուտինին հանգամանալից ներկայացվել է «Սիրիայում ներկա իրադրությունը, հեռանկարային պլանները»:
Ինչպես փոխանցում է Կրեմլի կայքը, ողջունելով Ասադին՝ Պուտինը վերահաստատել է միտքը, որ այսօր Սիրիայի տարածքում կռվում է նախկին ԽՍՀՄ տարածքից մոտ չորս հազար զինյալ, և «չի կարելի թույլ տալ, որպեսզի նրանք, ռազմական փորձ ձեռք բերած, հայտնվեն Ռուսաստանի տարածքում»:
Սիրիայի նախագահն իր հերթին նկատել է, որ ցանկացած ռազմական գործողություն ենթադրում է հետագա քաղաքական քայլեր:
«Իհարկե, բոլորիս նպատակը պետք է լինի այն, ինչ ցանկանում է տեսնել սիրիացի ժողովուրդը»,- ասել է Ասադը:
Ռուս-ամերիկյան փաստաթուղթ
Ռուսաստանն ու ԱՄՆ-ը կնքել են համաձայնագիր, որը, ինչպես ակնկալվում է, կօգնի խուսափել Սիրիայի երկնքում երկու երկրների ռազմաօդային ուժերի միջև հնարավոր միջադեպերից: Ինչպես հաղորդվում է, խոսքը չի գնում համագործակցության կամ գործողությունների համակարգման մասին:
ՌԴ ՊՆ ներկայացուցչի խոսքով՝ հուշագրի ստորագրումը կարևոր քայլ է: Պենտագոնի ներկայացուցիչն էլ ասել է, որ այն քաղաքական համաձայնագիր չէ:
***
Սեպտեմբերի 30-ին ռուսական ռազմաօդային ուժերը Սիրիայում՝ Լաթաքիայի ռազմակայանից, հասցրել են առաջին օդային հարվածները «Իսլամական պետության» դիրքերին: Նույն օրը՝ ավելի վաղ, Ռուսաստանի խորհրդարանի վերին պալատը՝ Դաշնային խորհուրդը, միաձայն հավանություն է տվել նախագահ Վլադիմիր Պուտինի առաջարկին՝ ռուսական զինուժն արտերկրում օգտագործելու վերաբերյալ: Հոկտեմբերի 7-ին օպերացիայում ներգրավվել է նաև ՌԴ ռազմածովային նավատորմը:
Պատմություններ
