Civilnet
«Իսլամական պետություն» ահաբեկչական խմբավորումը Պալմիրայում մահապատժի է ենթարկել երեք պատանդի՝ նրանց կապելով հնագույն սյուներին և պայթեցնելով դրանք:
Ինչպես հաղորդում է Մարդու իրավունքների սիրիական դիտորդական խումբը, հղում անելով տեղական աղբյուրներին, մահապատժի ենթարկվածների անունները հայտնի չեն:
Հոկտեմբերի սկզբին «Իսլամական պետությունը» Պալմիրայում պայթեցրել է Հին Հռոմի ժամանակաշրջանի երկուհազարամյա Հաղթակամարը:
Ավելի վաղ ԻՊ-ը ոչնչացրել էր ՅՈՒՆԵՍԿՕ-ի համաշխարհային ժառանգության ցանկում ներառված երկու տաճար. օգոստոսին պայթեցվել էր Բաալ-շամինի երկուհազարամյա տաճարը, ապա՝ Բելի հնագույն տաճարի մի մասը:
ՅՈՒՆԵՍԿՕ-ն դատապարտել է հնագույն կոթողների ոչնչացումը և տեղի ունեցածը որակել «ողբերգություն ամբողջ մարդկության համար»: ՅՈՒՆԵՍԿՕ-ի գլխավոր տնօրեն Իրինա Բոկովայի խոսքով՝ հուշարձանների ոչնչացումը «զինվորական հանցագործություն է»:
Պալմիրան ՅՈՒՆԵՍԿՕ-ի համաշխարհային ժառանգության օբյեկտ է, Մերձավոր Արևելքի ամենահայտնի ճարտարապետական համալիրներից մեկը: Ահաբեկիչները քաղաքը գրավել են այս տարվա մայիսին: Այն ժամանակ սպանվել էր ավելի քան 400 մարդ: Հունիսին ահաբեկիչներն ականապատել են Պալմիրան, իսկ հուլիսին ոչնչացրել քաղաքի հնագույն հուշարձաններից մի քանիսը: Օգոստոսի կեսին ծայրահեղականները գլխատել են Պալմիրայի ճարտարապետական համալիրի 82-ամյա տնօրեն, հայտնի հնագետ Խալեդ Ասաադին:
Հնագույն հուշարձանների ոչնչացումը ԻՊ-ը հիմնավորում է նրանով, որ մշակութային ժառանգությունը «կարող է խանգարել Սիրիայի և Իրաքի քաղաքացիներին հավատարմության երդում տալ ԻՊ-ին»: Ահաբեկիչները վստահ են, որ հնությունների վերացումը անհրաժեշտ է «ազգայնական օրակարգի» դեմ պայքարում:
Պատմություններ
