ՌԴ-ն Սիրիայում զենիթահրթիռային համակարգեր է տեղակայել՝ «հնարավոր սպառնալիքների դեմ»

Սիրիայում ռուսական Սու-25 գրոհիչներ

Ռուսաստանը Սիրիայում տեղակայել է զենիթահրթիռային համակարգեր այդ երկրում իր դիրքերին հնարավոր հարձակումներին դիմագրավելու նպատակով, այսպիսի հայտարարություն է արել Ռուսաստանի Դաշնության օդային-տիեզերական ուժերի գլխավոր հրամանատար, գեներալ-գնդապետ Վիկտոր Բոնդարյովը «Կոմսոմոլսկայա պրավդա» թերթի հետ զրույցում:

«Մենք հաշվարկել ենք բոլոր հնարավոր սպառնալիքները: Այնտեղ տեղակայել ենք ոչ միայն կործանիչներ, գրոհիչներ, ռմբարկուներ, հրթիռներ, այլև զենիթահրթիռային համակարգեր, քանի որ կարող են լինել տարբեր ֆորս-մաժորային իրավիճակներ»,- ասել է Բոնդարյովը:

Ինչպես պարզաբանել է գեներալը, այդպիսի արտառոց իրավիճակների թվում է ինքնաթիռի հափշտակումը կամ Սիրիայում ռուս զինծառայողների դեմ հարվածները:

Հարցին, թե ինչով էր պայմանավորված Սիրիայում նախևառաջ ինքնաթիռներ և հրթիռներ օգտագործելու վերաբերյալ որոշումը, Բոնդարյովը պատասխանել է, որ «ամեն օր հրթիռակոծելը ծախսատար է, ԻՊ-ն էլ չափազանց շարժական հրոսակախումբ է, որը փոխադրվում է մեքենաներով, մոտոցիկլետներով, հեծանիվներով, ավանակներով»:

Վիկտոր Բոնդարյով

«Ամեն հարվածից հետո նրանք դիրքափոխվում են: Այլ բան է ավիացիան»,- ասել է ՌԴ օդային-տիեզերական ուժերի գլխավոր հրամանատարը:

Բոնդարյովը նաև հերքել է լրատվամիջոցներում տեղ գտած լուրերն այն մասին, որ Սիրիայում հրթիռների պակաս կա:

Ռուսաստանի օպերացիան Սիրիայում

Սեպտեմբերի 30-ին ռուսական ռազմաօդային ուժերը Սիրիայի նախագահ Բաշար Ասադի խնդրանքով Լաթաքիայի ռազմակայանից հասցրել են առաջին օդային հարվածները Սիրիայում «Իսլամական պետության» դիրքերին: Նույն օրը՝ ավելի վաղ, Ռուսաստանի խորհրդարանի վերին պալատը՝ Դաշնային խորհուրդը, միաձայն հավանություն էր տվել նախագահ Վլադիմիր Պուտինի առաջարկին՝ ռուսական զինուժն արտերկրում օգտագործելու վերաբերյալ: Հոկտեմբերի 7-ին օպերացիայում ներգրավվել է նաև ՌԴ ռազմածովային նավատորմը: Օպերացիայի սկզբից ի վեր ռուսաստանցի օդաչուները ոչնչացրել են ահաբեկիչների ավելի քան երկու հազար օբյեկտ: Ռուսաստանը հայտարարել է, որ Սիրիայում ցամաքային գործողություններ սկսելու մտադրություն չունի:

Օպերացիայի տևողությունը

Նոյեմբերի 4-ին ՌԴ պաշտպանության փոխնախարար Անատոլի Անտոնովը հայտարարել է, որ օպերացիայի տևողությունը սահմանափակվում է ահաբեկիչների դեմ սիրիական բանակի հարձակողական գործողությունների անցկացման ժամկետներով:

Ըստ պաշտոնյայի՝ հարվածները հասցվում են բացառապես ահաբեկիչների դիրքերին:

«Այսպես կոչված՝ «չափավոր ընդդիմության» դիրքերին հարվածներ չեն հասցվում»,- ասել է Անտոնովը:

ՌԴ-ն Սիրիայում հրետանի է տեղակայում. Նուլանդ

ԱՄՆ պետքարտուղարի օգնական Վիկտորյա Նուլանդը հայտարարել է, որ Ռուսաստանը Սիրիայում հրետանի է տեղակայում: Վերջինս ասել է, որ Ռուսաստանը ծանր զինտեխնիկա է տեղակայում Հոմս և Համա քաղաքներում:

Ամերիկացի պաշտոնյան նաև տեղեկացրել է, որ սիրիական օպերացիայի վրա Ռուսաստանը օրական 2-4 մլն դոլար է ծախսում: Միևնույն ժամանակ, Նուլանդը Մոսկվային համագործակցության կոչ է արել: