Civilnet
ԱՄՆ-ը չի վարում քաղաքականություն, որը միտված է Ռուսաստանի մեկուսացմանը. դեկտեմբերի 15-ին Մոսկվայում Ռուսաստանի Դաշնության նախագահ Վլադիմիր Պուտինի և արտգործնախարար Սերգեյ Լավրովի հետ բանակցությունների ավարտին հայտարարել է ԱՄՆ պետքարտուղար Ջոն Քերին:
«Մենք չենք վարում Ռուսաստանի մեկուսացմանը միտված քաղաքականություն: Մենք մշտապես հայտարարում ենք, որ երբ ԱՄՆ-ն ու Ռուսաստանը համաձայնության եզրեր են գտնում, դա համապատասխանում է ամբողջ աշխարհի շահերին,- ասել է Քերին: - Մենք ձեռնարկում ենք համատեղ ջանքեր Իրանի, Սիրիայի հարցերով, քանի որ «Իսլամական պետությունը» սպառնալիք է բոլորիս համար»:
Ինչ վերաբերում է Ռուսաստանի դեմ սահմանված պատժամիջոցներին, ապա, ըստ Քերիի, «որքան արագ կատարվեն մինսկյան համաձայնությունները, այնքան ավելի արագ կվերացվեն ՌԴ-ի դեմ պատժամիջոցները»: Քերին շեշտել է, որ այդ ուղղությամբ անհրաժեշտ է համատեղել ջանքերը:
Ջոն Քերին անդրադարձել է նաև «Իսլամական պետության» դեմ պայքարին՝ նշելով, որ երկու պետությունների համատեղ աշխատանքը բավական արդյունավետ է ընթանում:
«Խոսել ենք մեր մտահոգության մասին այն հարցում, որ Ռուսաստանի որոշ ավիահարվածներ Սիրիայում ուղղված են չափավոր ընդդիմության դեմ, ոչ թե ԻՊ-ի: Պետք է նշեմ, որ նախագահ Վլադիմիր Պուտինը հարցն ընդունել է ի գիտություն»,- հայտարարել է ԱՄՆ պետքարտուղարը:
Ջոն Քերիի հանդիպումը Վլադիմիր Պուտինի և Սերգեյ Լավրովի հետ տևել է ավելի քան երեք ժամ:
Բանակցություններից հետո հայտարարվել է, որ ԱՄՆ-ն ու Ռուսաստանը հույս ունեն առաջիկա ուրբաթ օրը Սիրիայում խաղաղ կարգավորման գործընթացի օգտին ՄԱԿ-ի Անվտանգության խորհրդի միջոցով բանաձև ընդունել:
Սերգեյ Լավրովի խոսքով՝ բանաձևը կսատարի նոյեմբերին Վիեննայում հաստատաված խաղաղ գործընթացի սկզբունքներին:
Պատմություններ
