Civilnet
Հունվարի 31-ին Դամասկոսում՝ Սաիդա Զեյնաբ շիական մզկիթի մոտ, տեղի է ունեցել պայթյուն, որը խլել է առնվազն 60 կյանք, վիրավորվել է առնվազն 110 մարդ:
Ինչպես հաղորդում են միջազգային լրատվամիջոցները, հարձակումը տեղի է ունեցել այն ժամանակ, երբ սիրիական կառավարության և ընդդիմության ներկայացուցիչները հավաքվել էին Ժնևում՝ երկրում քաղաքական կարգավորման շուրջ բանակցություններ անցկացնելու նպատակով: Ահաբեկչական գործողության համար պատասխանատվություն է ստանձնել «Իսլամական պետություն» ահաբեկչական խմբավորումը:
ԵՄ ներկայացուցիչը հայտարարել է, որ հարձակման նպատակն էր խաթարել խաղաղ բանակցությունները:
Ըստ հաղորդագրությունների՝ հարձակումը անցել է երկու փուլով. նախ պայթեցվել է մզկիթի մոտ գտնվող ականապատված մի մեքենա, ապա, երբ դեպքի վայրում հավաքվել են տուժածներին օգնել ցանկացող տասնյակ մարդիկ, երկու մահապարտ ահաբեկիչներ պայթեցրել են իրենց ամբոխի մեջ: Որոշ ականատեսներ պնդում են, որ տեղի է ունեցել երեք պայթյուն:
Սիրիական հեռուստատեսությունը ցուցադրել է հրդեհվող շենքերի և մեքենաների կադրեր:
Սիրիայի կառավարական պատվիրակությունն ու ընդդիմության ներկայացուցիչներն այժմ Ժնևում են, սակայն բանակցությունները դեռ չեն մեկնարկել: Սիրիայի դեսպան, կառավարական պատվիրակության ղեկավար Բաշար Ջաաֆարին հայտարարել է, որ տեղի ունեցած ահաբեկչությունն ապացուցում է կապը Սաուդյան Արաբիայի կողմից հովանավորվող իսլամիստական ընդդիմության և ահաբեկչության միջև:
Սիրիական գլխավոր ընդդիմությունը պահանջում է, որ կառավարությունը նախ կատարի մարդասիրական բնույթի իր պահանջները՝ դադարեցվի ընդդիմության վերահսկողության տակ գտնվող քաղաքների պաշարումը, ինչպես նաև ազատ արձակվեն պատանդներն ու ապահովվի խաղաղ բնակչության անվտանգությունը:
Ինչպես ակնկալվում է, դե Միստուրան այսօր առանձին հանդիպումներ կունենա Սիրիայի կառավարական պատվիրակության և ընդդիմության ներկայացուցիչների հետ:
Պատմություններ
