Civilnet
ԱՄՆ-ն ու Ռուսաստանը Սիրիայում հրադադարի ռեժիմի նախագիծ են համաձայնեցրել: Ինչպես ասված է Մոսկվայի և Վաշինգտոնի համատեղ հայտարարության մեջ, այն ուժի մեջ կմտնի փետրվարի 27-ին:
Հայտարարության մեջ նշված է, որ հրադադարի պայմանները տարածվում են «հակամարտության բոլոր կողմերի վրա, բացառությամբ «Իսլամական պետություն» (ԻՊ) և «Ջաբհաթ Ալ-Նուսրա», ինչպես նաև այլ ահաբեկչական խմբավորումների վրա, որոնք որպես այդպիսին են ճանաչվել ՄԱԿ-ի Անվտանգության խորհրդի կողմից»:
Մոսկվան և Վաշինգտոնը պայմանավորվել են, որ ռազմական գործողությունների դադարեցման ռեժիմը գործում է սիրիական հակամարտության այն կողմերի հանդեպ, որոնք «հայտարարել են այդ որոշմանը միանալու մասին»:
Ըստ համաձայնության՝ Դամասկոսն ու ընդդիմության ուժերը պարտավորվում են դադարեցնել միմյանց դեմ ռազմական գործողությունները՝ ցանկացած սպառազինությունների կիրառմամբ: Պայմանավորվածությանը միացած կողմերը պետք է հրաժարվեն տարածքների նվաճումից և մարդասիրական կազմակերպություններին մատչում տրամադրեն այն գոտիներ, որոնք գտնվում են նրանց վերահսկողության տակ:
Համաձայնության մեջ առանձին ընդգծվում է ուժի համաչափ կիրառումը:
Ռուսաստանի օդային-տիեզերական ուժերի և ԱՄՆ գլխավորած միջազգային կոալիցիայի հակաահաբեկչական գործողություններն ընթանալու են հայտարարված հրադադարի ֆոնին:
«Ռազմական գործողությունները, այդ թվում՝ Սիրիայի Արաբական Հանրապետության, Ռուսաստանի զինված ուժերի և ԻՊ-ի դեմ կոալիցիայի ավիահարվածները, կշարունակվեն «Իսլամական պետության», «Ջաբհաթ Ալ-Նուսրայի» և այլ ահաբեկչական կազմակերպությունների դեմ, որոնք որպես այդպիսին են ճանաչվել ՄԱԿ-ի ԱԽ կողմից»,- ասված է փաստաթղթում:
Համաձայնության շրջանակում ԱՄՆ-ն ու Ռուսաստանը կստեղծեն տեղեկատվության փոխանակման թեժ գիծ:
SANA գործակալության փոխանցմամբ՝ Սիրիայի նախագահ Բաշար Ասադը հրամանագիր է ստորագրել ապրիլի 13-ին երկրում խորհրդարանական ընտրություններ անցկացնելու վերաբերյալ:
Պատմություններ
