Մոսկվայի որոշումը «Դամասկոսի համար անսպասելի կամ անհանգստացնող չէր»

Սիրիայի նախագահ Բաշար Ասադի խորհրդական Բուսեյն Շաաբանը Al Mayadeen հեռուստաալիքի հետ զրույցում հայտարարել է, որ ՌԴ ղեկավարության՝ Սիրիայում օդային-տիեզերական ուժերի կրճատման որոշումը Դամասկոսի համար «անսպասելի կամ անհանգստացնող չէր»:

«Մոսկվայի գործողությունները որպես Դամասկոսի վրա ճնշում գործադրելու փորձ որակելը որևէ հիմք չունի: Ռուսաստանի որոշումը ընդունվել է Սիրիայի ղեկավարության հետ խորհրդակցությունների արդյունքում և հաշվի առնելով իրավիճակը ռազմաճակատներում»,- հայտարարել է Շաաբանը՝ շեշտելով, որ «ոչ ոք չի կարող Սիրիային և նրա ժողովրդին պարտադրել մի համաձայնություն, որը սիրիական կառավարության հավանությանը չի արժանացել»:

Ասադի խորհրդականը հերքել է նաև Սիրիայի հնարավոր դաշնայնացման մասին պնդումները:

***

Ռուսաստանի նախագահ Վլադիմիր Պուտինը հրահանգել է մարտի 15-ից սկսել ռուսական հիմնական ուժերի դուրսբերումը Սիրիայից: Պուտինի խոսքով՝ պաշտպանության նախարարության և զինված ուժերի առջև դրված «առաջադրանքն ընդհանուր առմամբ կատարվել է»:

«Մեր հենակետերը` ծովայինը` Տարտուսում, և ավիացիոնը` «Հմեյմիմ» օդակայանում, կգործեն նախկին ռեժիմով: Դրանք պետք է հուսալի կերպով պաշտպանված լինեն ցամաքից, ծովից և օդից»,- նշել է Ռուսաստանի նախագահը:

Երեկ Սու-34 ռմբակոծիչ ինքնաթիռների առաջին խմբաքանակը Սիրիայի «Հմեյմիմ» ավիաբազայից վերադարձել է Վորոնեժ քաղաք:

Վերլուծաբանները հակված են մտածելու, որ Սիրիայից ռազմաօդային ուժերը դուրս բերելու մասին Պուտինի անսպասելի հայտարարությունը ոչ այլ ինչ է, քան դիվանագիտական ժեստ, որը համընկել է Ժնևում Սիրիայի հարցով բանակցությունների հերթական փուլի հետ: Բացի այդ, խոսք չի գնում ռուսական զինված ուժերն ամբողջությամբ դուրս բերելու մասին: Մեկ այլ շրջանառվող վարկածի համաձայն՝ Ռուսաստանն այլևս ֆինանսապես ի վիճակի չէ շարունակել սիրիական արշավը:

Ինչպես գրել է «РБК» պարբերականը, Ռուսաստանի ծախսերը Սիրիայում ռազմական օպերացիայի վրա կարող են համարժեք լինել առնվազն 38 մլրդ ռուբլիի (ավելի քան կես միլիարդ դոլար):

«Սիրիական արշավի 167 օրերի ընթացքում օպերացիայի մեկ օրվա գինը կարող էր աճել մեկուկես անգամ»,- գրում է «РБК»-ն՝ հիմք ընդունելով ՌԴ պաշտպանության նախարարության հրապարակած տվյալներն ու փորձագետների գնահատականները:

Ըստ պարբերականի՝ 2015-ի հոկտեմբերին օպերացիայի մեկ օրվա գինը կազմել է մոտ 2,5 մլն դոլար: Հաշվարկներում հաշվի է առնվել թռիչքների ծախսը, աշխատավարձերը, բեռների առաքումը և այլ տարատեսակ ծախսեր:

Bloomberg գործակալության փորձագետներն էլ կարծում են, որ Սիրիայից զորքերի դուրսբերումը Մոսկվային անհրաժեշտ էր Դամասկոսին ստիպելու, որ ավելի ճկուն լինի:

Գործակալության հետ զրույցում վերլուծաբանները կարծիք են հայտնել, որ այդ քայլը կարող է լրջորեն բարդացնել Մոսկվայի և Թեհրանի հարաբերությունները. Ռուսաստանը, ըստ ամենայնի, հոգնել է Սիրիայի նախագահի անզիջում լինելուց, մինչդեռ Թեհրանը շարունակում է լիովին աջակցել Բաշար Ասադին: