Civilnet
ՀՀ մարդու իրավունքների պաշտպան Արման Թաթոյանը սիրիահայերի իրավունքների պաշտպանության հարցով դիմել է մարդու իրավունքների պաշտպանության միջազգային մարմիններին։
Ինչպես հաղորդում են օմբուդսմենի գրասենյակից, Սիրիայում բնակվող հայերի անվտանգության երաշխավորման և վերջիններիս աջակցություն տրամադրելու խնդրով Թաթոյանը դիմել է ՄԱԿ-ի մարդու իրավունքների գերագույն հանձնակատարին, Եվրոպայի խորհրդի մարդու իրավունքների գերագույն հանձնակատարին, Եվրոպական միության արտաքին քաղաքականության և անվտանգության հարցերով բարձր ներկայացուցչին, Եվրոպական օմբուդսմենների ինստիտուտի, Միջազգային օմբուդսմենների ինստիտուտի, Կարմիր խաչի միջազգային կազմակերպության ղեկավարներին:
«Միջազգային կառույցներին ուղղված նամակներում Մարդու իրավունքների պաշտպանն իր մտահոգությունն է հայտնել, մասնավորապես, վերջին ամիսներին տեղի ունեցած ռմբակոծությունների հետևանքով հայերի մահվան և վնասներ կրելու դեպքերի առնչությամբ` խնդրելով այդ մարմինների իրավասության սահմաններում գործուն աջակցություն»,- ասված է ՄԻՊ գրասենյակի հաղորդագրության մեջ:
***
Վերջին մի քանի շաբաթներին Հալեպի հայությունը, ինչպես քաղաքի ամբողջ բնակչությունը, պատերազմական գործողությունների ուժգնացման հետևանքով հայտնվել է օրհասկան վիճակում։
Հոկտեմբերի սկզբին սիրիահայերին Հայաստան տեղափոխման հարցում ֆինանսապես աջակցելու պատրաստակամություն էր հայտնել Հայաստանի զարգացման նախաձեռնություններ (IDeA) հիմնադրամը։ Նախօրեին հիմնադրամը հայտարարեց, որ սիրահայերին աջակցելու համար տրամադրում է 250 հազ․ դոլար և սկսում է դրամահավաքի արշավ։
Հալեպում սեպտեմբերի վերջից սրված իրադրության կապակցությամբ ավելի վաղ Հայաստանից Սիրիա էր ուղարկվել մարդասիրական օգնությամբ բեռնված երկու ինքնաթիռ։
Հալեպում տիրող իրադրության և սիրիահայերին առնչվող խնդիրների վերաբերյալ կարդացեք նաև Հալեպում վիճակը օրհասական է, մեծ է Հայաստանում հաստատվել ցանկացողների թիվը. հալեպահայ գործիչ, «Հալեպում հավատում են Ռուբեն Վարդանյանի խոստմանը և անհամբերությամբ սպասում դրա իրագործմանը» , «Հալեպահայերին Հայաստան և ոչ այլ երկիր տեղափոխելը սկզբունքի հարց է, մարտահրավեր է Հայաստանում մնալը» հրապարակումները։
Պատմություններ
