Հայաստանը պաշտպանության հարցերով կցորդ կունենա ԵՄ-ում

Հայաստանը որոշել է Եվրոպական միությունում ՀՀ ներկայացուցչությանը կից պաշտպանության հարցերով կցորդ նշանակել։ Այս որոշման նախագիծը ներառվել է կառավարության նիստի օրակարգի չզեկուցվող հարցերի ցանկում և ներկայացվել է Պաշտպանության նախարարության կողմից։

Կառավարության հիմնավորման համաձայն՝ որոշումը կայացվել է հաշվի առնելով վերջին շրջանում պաշտպանական, անվտանգային և ռազմական ոլորտներում Բելգիայի և Եվրոպական միության հետ Հայաստանի համագործակցության էական զարգացումը։ 

«Նախատեսվում է Հյուսիսատլանտյան պայմանագրի կազմակերպությունում (այսուհետ՝ ՆԱՏՕ) ՀՀ առաքելությանը կից  պաշտպանական հարցերով կցորդին համատեղության կարգով Եվրոպական միությունում, ինչպես նաև Բելգիայի Թագավորությունում ՀՀ պաշտպանության հարցերով  կցորդ նշանակելը և հավատարմագրելը»,- ասված է որոշման մեջ։

Եվրոպական միությունում ՀՀ ներկայացուցչությանը կից գործելով՝ պաշտպանության հարցերով կցորդը հնարավորություն կունենա մասնակցել տարբեր քննարկումների և ներկայացնել Հայաստանի ռազմական ու ռազմաքաղաքական առաջնահերթությունները, ինչպես նաև միջազգային խաղաղության և անվտանգության պահպանման վերաբերյալ մոտեցումները։

Այս որոշումը ՀՀ պաշտպանության նախարարությանը կընձեռի Եվրոպական միությունում պաշտպանության հարցերով կցորդի միջոցով արդյունավետ աշխատանք իրականացնելու հնարավորություն։ Այն նաև կնպաստի ինստիտուցիոնալ կապերի հետագա ամրապնդմանն ու զարգացմանը և ռազմական ու ռազմաքաղաքական փոխգործակցության հնարավորությունների ընդլայնմանը։