Civilnet
Սիրիայի նոր կառավարությանը հավատարիմ անվտանգության ուժերը մեղսակից են Լաթաքիայում ալավիական փոքրամասնության ավելի քան 300 խաղաղ բնակիչների մահվան մեջ, հաղորդում է Մեծ Բրիտանիայում տեղակայված Մարդու իրավունքների սիրիական դիտորդական կենտրոնը (Syrian Observatory for Human Rights)։ Նրանք զոհվել են անվտանգության ուժերի և պաշտոնանկ արված նախագահ Բաշար Ասադի կողմնակիցների միջև բախումների ժամանակ։
Մարդու իրավունքների սիրիական դիտորդական կենտրոնը տվյալները փոխանցել են AFP-ն և Reuters-ը։ Ըստ այդմ, հինգշաբթի, մարտի 6-ին բախումներն սկսվելուց ի վեր, «Սիրիայի առափնյա շրջաններում և Լաթաքիայի լեռներում անվտանգության ուժերի և դաշնակից խմբավորումների կողմից սպանվել է 340 ալավի խաղաղ բնակիչ»:
Դիտորդներն ասում են, որ ալավի խաղաղ բնակիչները սպանվել են «մահապատիժների» արդյունքում, որոնք ուղեկցվել են «նրանց տների և ունեցվածքի կողոպուտով»: Սպանվածների թվում կան կանայք և երեխաներ։
Բախումները սկսվել են հինգշաբթի՝ մարտի 6-ին։ Ընդհանուր առմամբ, Մարդու իրավունքների սիրիական դիտորդական կենտրոնի տվյալներով, այդ ժամանակից ի վեր սպանվել է 553 մարդ, այդ թվում՝ նոր կառավարության անվտանգության ուժերի 93 անդամ և Ասադի 120 կողմնակից։
Շաբաթ օրը՝ մարտի 8-ին, տարածաշրջանում, ըստ Դիտորդական կենտրոնի, «համեմատաբար հանգիստ է» եղել, սակայն անվտանգության ուժերը շարունակել են «մաքրման» գործողությունները և ուղարկել լրացուցիչ ուժեր:
Շաբաթ առավոտյան սիրիական պաշտոնական SANA գործակալությունը հայտնել է, որ անվտանգության ուժերը հետ են մղել «տապալված ռեժիմի մնացորդների հարձակումը» ծովափնյա Լաթաքիա քաղաքի ազգային հիվանդանոցի վրա։
Տե՛ս նաև՝ Սիրիայում Ասադի կողմնակիցների և բանակի միջև բախումներ են տեղի ունեցել, կան զոհեր
Պատմություններ
