CivilNetCheck
Civilnet
Շուշան Ստեփանյան, #CivilNetCheck
Սոցցանցերում տարածվում են գրառումներ IDram-ի անունից՝ հայտարարությամբ, թե ինտերնետային վճարային համակարգը Զատկի տոնի առթիվ առաջարկում է մասնակցել շահումով խաղի։
«Idram բանկի կողմից սուրբ Զատկի տոնական ռուլետկա։ Հասցրու շահել մինչև 150,000 դրամ»,- նշված է գրառման մեջ։
Մեկ այլ հրապարակման մեջ էլ նշվում է, թե IDram-ը հարցմանը մասնակցելու դիմաց 30,000 դրամ է տալիս։
«Շահումով խաղին» կամ «հարցմանը» մասնակցելով, սակայն, IDram-ի հաճախորդներն իրականում գումարներ են կորցնելու։
Ո՞ւր են տանում IDram-ի անունից գրառումներ տարածող կայքերը
Խաղի վերաբերյալ հրապարակմանը կցված է IDram-ի կայքին նմանակող idrann.live կայքը։ Պտուտակախաղին մասնակցելուց հետո շնորհավորական տեքստ է երևում էկրանին։
Գումարը ստանալու համար հաճախորդից պահանջվում է մուտաքագրել հեռախոսահամարը, IDram հաշվի մուտքանունն ու PIN կոդը։
Այս կայքը, սակայն, ֆիշինգային կայք է, որի միջոցով զեղծարարները IDram-ի հաճախորդների տվյալներն են կորզում։
Ինչ վերաբերում է մյուս գրառմանը, ապա այն տարածվում է երգիչ Միհրան Ծառուկյանի լուսանկարով։ Միհրան Ծառուկյանը չի հանդիպում IDram-ի գովազդներում, իսկ լուսանկարն օգտագործված է ընդամենը գրավելու և վստահություն ներշնչելու համար։
«Ակցիային կարող են մասնակցել միայն ԻԴՐԱՄ բանկի գործող հաճախորդները։ Հարցմանը մասնակցելու համար ստացեք 30,000 դրամ»,- նշված է գրառման մեջ։
Մինչդեռ կցված կայքում, որը նմանակում է IDram-ի իրական կայքին, նշվում է հարցմանը մասնակցելու դիմաց 20,000 դրամ ստանալու մասին։
Այս դեպքում ևս կցված կայքը անձնական և բանկային տվյալներ կորզող ֆիշինգային կայք է։
IDram անվանումով բանկ չկա Հայաստանում. գործում է IDBank-ը, որը IDram ընկերության հետ ID Group-ի մաս է կազմում։
IDram-ի պաշտոնական ֆեյսբուքյան էջը Idram Payment System-ն է, կայքը՝ idram.am-ը։
IDram-ի անունից հարցումների, նախատոնական մրցանակների վերաբերյալ նախկինում ևս կեղծ գրառումներ են տարածվել, որոնց #CivilNetCheck-ն արդեն անդրադարձել է։
Պատմություններ
