ԵՄ դիտորդներն ու ՀՀ ՊՆ-ն հերքում են Ադրբեջանի ՊՆ-ի հաղորդագրությունները

ԵՄ դիտորդական առաքելությունը մարտի 16-17-ը հայ-ադրբեջանական սահմանին արտասովոր ակտիվություն չի նկատել։ Այս մասին ասված է առաքելության X-ի միկրոբլոգում։

«ԵՄ դիտորդական առաքելությունը մարտի 16-17-ին պարեկներ է ուղարկել Հայաստան-Ադրբեջան սահմանի տարբեր վայրեր։ Իրավիճակը մնում է հանգիստ և հանդարտ, արտասովոր ակտիվություն չի նկատվում»,- ասված է գրառման մեջ։

Այս հայտարարությամբ ԵՄ դիտորդական առաքելությունը հերքել է Ադրբեջանի ՊՆ տարածած հաղորդագրությունները, թե ՀՀ ԶՈՒ ստորաբաժանումները կրակ են բացել ադրբեջանական դիրքերի ուղղությամբ։

Մարտի 16-ին ՀՀ ՊՆ-ն ևս հերքել էր Ադրբեջանի ՊՆ-ի՝ օրվա տարբեր ժամերի տարածած երեք հաղորդագրությունները, թե ՀՀ ԶՈւ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ։

ՀՀ ՊՆ-ն հիշեցրել է Հայաստանի Հանրապետության վարչապետի աշխատակազմի առաջարկը՝ հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծելու մասին, ինչին մինչև օրս Ադրբեջանը չի արձագանքել։

Մարտի 13-ին Ադրբեջանը և Հայաստանը հայտարարեցին, որ համաձայնեցրել են խաղաղության պայմանագրի 17 կետերից վերջին երկուսը։ Աշխարհի առաջնորդները ողջունել են խաղաղության փաստաթղթի դրույթներին Երևանի և Բաքվի համաձայնությունը։

Հայաստանում, սակայն, մտահոգություններ են հնչում, որ անգամ համաձայնագրի ստորագրումից հետո Ադրբեջանը շարունակելու է խոչընդոտել խաղաղության հաստատումը, քանի որ դա կապում է Հայաստանի Սահմանադրության փոփոխության և այլ հարցերի հետ։